Թուրքական Doğan լրատվական գործակալության փոխանցմամբ՝ Թուրքիայի Ազգային մեծ ժողովի (ԹԱՄԺ) նախագահ, իշխող «Արդարություն և զարգացում» կուսակցության (ԱԶԿ) ներկայացուցիչ Ջեմիլ Չիչեքը Թուրքիայի Հանրապետության 88-ամյակին նվիրված միջոցառման ժամանակ հայտարարել է, որ Թուրքիան պատրաստ է առերեսվել սեփական պատմության ու անցյալի հետ.
«Համայն աշխարհում մեր հասցեին մեղադրանքներ են հնչում 1915 թվականին տեղի ունեցած իրադարձությունների վերաբերյալ։ Այդ կապակցությամբ մենք պատրաստ ենք առերեսվել մեր պատմության հետ։ Ով ինչ էլ ասի, մենք բացել ենք մեր արխիվները և պատրաստ ենք քննարկել պատմաբանների աշխատությունները։ Սխալ տեղեկությունների հիման վրա եզրահանգումներ անելու փոխարեն, ավելի ճիշտ կլիներ մեր գիտնականների հետ քննարկել նրանց ներկայացրած իրողությունները»։
Հիշեցնենք, որ այսօր Թուրքիայի արտգործնախարար Ահմեդ Դավութօղլուն հայտարարել էր, որ Թուրքիան պատրաստ է Հայոց ցեղասպանության ուսումնասիրման համատեղ հանձնաժողովի ձևավորմանը։