«Սարդարապատ» շարժման նախաձեռնող խմբի անդամներ Տիգրան Խզմալյանը և Ալեք Ենիգոմշյանն այսօր ասուլիս էին հրավիրել ջավախահայ քաղաքական գործիչ Վահագն Չախալյանի (2008թ. հուլիսի 21-ին Վահագն Չախալյանը ձերբակալվել և 2009թ. ապրիլի 7-ին բոլոր պատիժների գումարման սկզբունքի կիրառմամբ 10 տարվա ազատազրկման է դատապարտվել Վրաստանի Ախալցխայի շրջանի առաջին ատյանի դատարանի կողմից մի շարք շինծու մեղադրանքների հիման վրա) գործով:
Տիգրան Խզմալյանի խոսքերով`Վահագն Չախալյանը Հրանտ Դինքն է, մեկն է, ով գլխավորում է ջավախահայության ազատատենչ պայքարը հանուն իրենց արժանապատվության, բնիկ ժողովուրդ լինելու, իրենց լեզվի, իրենց հայ լինելու իրավունքների:
«Այսօր մենք Թիֆլիսի բանտում նստած քաղբանտարկյալ ունենք`Վահագն Չախալյանը: Մենք եկել ենք, որ թույլ չտանք դա մոռացվի ո՛չ հայ, ո՛չ վրացի քաղաքացիական հասարակության կողմից»,- նշեց Տիգրան Խզմալյանը:
Ալեք Ենիգոմշյանի խոսքերով`Խորհրդային Միության փլուզումից հետո Ջավախքն ապրեց ոգևորություն և փորձեց հաստատել իր ինքնությունը: Ջավախահայությունը, ելնելով որոշակի նկատառումներից, չի դրել անջատման խնդիր, պարզապես նրանք պահանջել են շրջանի և ժողովրդի պահպանման երաշխիք:
«Եթե Ջավախքում 90-ականներին հայապահպանությունը հաջողվում էր, 2000-ականներին, ցավոք, իրավիճակը սկսեց փոխվել: Հայաստանի իշխանությունները մեղմ քաղաքականություն որդեգրեցին` հասնելով մինչև Ջավախքը սփյուռք կոչելու աստիճանին»:
Հենց այդ ժամանակ էլ Միասնական Ջավախք շարժումն է ծնվել, որի հիմքում Չախալյանն ու իր ընկերներն են: Վրաստանի իշխանությունները, Ա. Ենիգոմշյանի խոսքերով, 2008-ը հարմար ժամանակ համարեցին և օգտվելով հայկական իշխանությունների թույլ կեցվածքից`հարվածեցին Միասնական Ջավախք շարժումը և ձերբակալեցին Վահագն Չախալյանին:
«Երեքուկես տարի է` Վահագնը գտնվում է բանտում, խիստ ռեժիմի գաղութում և ենթարկվում է խիստ պայմանների,- ասաց Ա. Ենիգոմշյանը,- և հիմա նրա գործը գտնվում է Եվրադատարանում»:
Ալեք Ենգիոմշյանը փաստեց, որ Վահագնի և Ջավախքի խնդիրները իրար հավասար հարցեր են. վերջին տարիներին թուրքերի ներթափանցումը Ջավախք աստիճանաբար ավելի տեսանելի է դառնում, ինչը վրացական իշխանությունների որդեգրած քաղաքականության արդյունքն է:
Տիգրան Խզմալյանը երկու խնդիր է առանձնացնում. առաջին` վրացական իշխանությունները ջանում են խնդիրը ներկայացնել որպես ազգային փոքրամասնությունների հետ կապված հարց, ինչը մեր պաշտոնական մակարդակում ընդունվում է:
Ըստ Տ. Խզմալյանի`ջավախահայության այսօրվա նսեմացված վիճակը պետական այրերի կեցվածքի հետևանք է, Երևանի լուռ աջակցությունն ակնհայտ է:
«Վահագնին սկզբում ձերբակալեցին Երևանում և նրան հանձնեցին սահմանի վրա, որից հետո մի շարք սադրանքների արդյունքում Վահագնը հայտնվեց բանտում. այս ամենը կատարվում է մի շարք տագնապալից զարգացումների ընթացքում»,- նկատեց Տիգրան Խզմալյանը:
Մեծ թափով կառուցվում է Կարս-Ախալքալաք- Բաքու երկաթուղին, որը կոչված է վերջնականապես շրջափակել Հայաստանը նաև հյուսիսից:
Ալեք Ենիգոմշյանն էլ փաստեց, որ այս ամբողջ ընթացքում իշխանությունները լուրջ մեղք ունեն Վահագն Չախալյանի այսօվա կրած ճակատագրի համար:
Վահագն Չախալյանի և Ջավախքի կարճաժամկետ և երկարաժամկետ ճակատագրերը կապակցված լուծում են պահանջում, և ըստ Ա. Ենիգոմշյանի`Վահագնի հարցի լուծումը Ջավախքի Գորդյան հանգույցի բացումը կլինի, և ընդհակառակը` այնքան ժամանակ, քանի դեռ Վ. Չախալյանը մնում է անազատության մեջ, Ջավախքի խնդիրը մնում է:
Ի դեպ, երկուշաբթի օրը, ժամը 15:00-ին, Հայաստանի երգչախմբային միության դահլիճում «Կուր-Արաքս» հիմնադրամը և «Սարդարապատ» շարժումը հրավիրելու են միջոցառում` նվիրված Վահագն Չախալյանին և ջավախահայության խնդիրներին:
