Վրացական GHN լրատվական գործակալության փոխանցմամբ՝ վրացի ընդդիմադիր միլիարդատեր Բիձինա Իվանիշվիլին տարածաշրջանային ԶԼՄ-ների համար կազմակերպված մամլո ասուլիսում հայտարարել է, որ 2004 թվականին նախագահ Միխեիլ Սաակաշվիլիին առաջարկել է 1 միլիարդ դոլար՝ երկրի գյուղատնտեսությունը զարգացնելու համար.
«Իշխանության գալուց հետո ես մտադիր եմ զարգացնել գյուղատնտեսական ոլորտը՝ բարեփոխումներ անցկացնելով դրանում։ Ես մեծացել եմ գյուղում և գյուղացու որդի եմ, դրա համար էլ շատ լավ պատկերացում ունեմ, թե ինչ բան է գյուղացու չարչարանքը։ Խորհրդային միության ժամանակ կային համեմատաբար հարուստ և աղքատ գյուղեր։ Իսկ այժմ այդպես չէ։
Բոլոր գյուղացիները նման են իրար, և բոլորն էլ ծայրահեղ կարիքավորներ են։ Մենք պետք է ամեն ինչ անենք գյուղին օգնելու համար։ 2004 թվականին ես նախագահին առաջարկեցի 1 միլիարդ դոլար՝ ագրարային ոլորտի զարգացման մեջ ներդնելու համար։ Իշխանության գալուց անմիջապես հետո մենք անհապաղ բարեփոխումներ կսկսենք գյուղատնտեսության ոլորտում»։
Իվանիշվիլին չի մոռացել նաև անդրադառնալ Սաակաշվիլիի կողմից իրեն Վրաստանի քաղաքացիությունից զրկելուն. «Սաակաշվիլին բացարձակապես ապօրինաբար է չեղյալ հայտարարել իմ քաղաքացիությունը։ Մենք այդ կապակցությամբ դատական հայց ենք ներկայացրել։
Բոլորին հայտնի է, թե որքան արդար է այսօր վրացական դատարանը։ Այսօր այն ներկայացված է մեկ անձով. Սաակաշվիլին և՛ դատավոր է, և՛ դատախազ։ Այսօր ես գործածում եմ միայն ֆրանսիական աձնագիրը, սակայն մենք Սաակաշվիլիին կհարկադրենք վերադարձնել իմ քաղաքացիությունը»։
Հիշեցնենք, որ Սաակաշվիլիի հրամանով Իվանիշվիլիին, ինչպես նաև նրա կնոջը Վրաստանի քաղաքացիությունից զրկել են այս տարվա հոկտեմբերի 11-ին՝ քաղաքականություն վերադառնալու մասին Իվանիշվիլիի արած հայտարարությունից ընդամենը 4 օր անց։
