«Ազատություն» ռադիոկայանի թղթակցի հետ զրույցի ընթացքում ընդդիմադիր Հայ ազգային կոնգրեսի մաս կազմող «Հանրապետություն» կուսակցության նախագահ Արամ Սարգսյանը կարծիք է հայտնել, որ արտահերթ ընտրություններն անհավանական չեն, և հինգ ամիսը քիչ ժամանակ չէ իշխանություններին դրանք պարտադրելու համար:
«Այդ հնարավորությունը միշտ կա: Եթե, ասենք, 72 միլիոնանոց Եգիպտոսում 100 հազարը ստիպում է Մուբարաքի նման մարդուն հրաժարական տալ, այստեղ այդ նույն քանակությունը բավարար է, որ մինչև խորհրդարանական ընտրությունները նախագահի հրաժարական պահանջի գործող իշխանությունից, և այդ գործընթացը իրական արդյունք տա»,- ասել է Սարգսյանը։
Պատասխանելով այն հարցին, թե ինչը կարող է ստիպել իշխանություններին գնալ արտահերթ ընտրությունների, Արամ Սարգսյանն ասել է, որ դրա համար հասարակական լայն զանգվածների մասնակցություն է պետք և այդ է պատճառը, որ Կոնգրեսի մարտավարությունն ավելի շատ մարդաշատություն ապահովելուն է ուղղված։ Ըստ ընդդիմադիր գործչի՝ կան նաև քաղաքական պատրվակներ, որոնք գարնանը համընկան նաև հասարակության սոցիալական անբավարարվածության, ներքաղաքական իրավիճակների հետ, և հասարակությունը փողոց դուրս եկավ:
«Բայց, ես ասում եմ` կա հարմար ժամանակաշրջան, կա ավելի լավ ժամանակաշրջան, որի դեպքում այդ գործընթացը ծավալելը կլինի արդյունավետ: Օրինակ, իմ կարծիքով, փետրվար ամիսը ամենահարմար ժամանակաշրջանն է այդ գործընթացները ծավալելու համար: Ու այստեղ շատ կարևոր է նաև արտագնա ծանր աշխատանքով սեփական ապրուստը վաստակող մարդկանց մասնակցությունը: Իրենք ձմռանը` Նոր տարուց առաջ վերադառնում են տուն: Իսկ դա ահռելի թիվ է Հայաստանում: Հենց մեր Վիճպետվարչության տվյալներով, այդ քանակությունը 60-100 հազարի սահմանում է, որոնք գալիս ու գնում են: Ու պատկերացրեք, դրանից 30-40 հազարը մասնակցում է մեր հանրահավաքներին: Ու դա հստակ Հայ ազգային կոնգրեսի պոտենցիալն է: Գարնանային հանրահավաքների բազմամարդությունը նաև այդ մարդկանց մասնակցության արդյունքն էր»:
«Հանրապետություն» կուսակցության առաջնորդը տեղեկացրել է, որ Հայ ազգային կոնգրեսը «թե’ երկարաժամկետ, թե’ կարճաժամկետ ծրագրերի համար մոտեցումներ ունի»:
Ինչ վերաբերում է իշխանության ներսում վերջին զարգացումներին, պաշտոնյաների փոխատեղումներին, Արամ Սարգսյանն ասել է. «Սեփական թիմին ցույց տալու, որ ես ազդեցություն ու ուժ ունեմ, որ ես ձևավորում եմ իմ թիմը: Եվ այդ խնդիրը գործող նախագահը իսկապես ունի` սեփական թիմ ձևավորելու, որովհետև կասկածից վեր է, որ գործող նախագահը իր պլաններում նախատեսում է ևս մեկ ժամկետ նախագահ լինելու: Եվ այդ պլանները դեռ մի տարի առաջ ի ցույց դրեց` կոալիցիոն համաձայնագրի նոր թուղթ ստորագրելով: Այսինքն` մարդը վախենում է (զրկվել) նորից ընտրվելու հնարավորությունից և ճիշտ է անում, որ վախենում է: Որովհետև ինքն էլ է նկատել, որ աշխարհը փոփոխվում է, որ իր մնալը այդքան էլ միանշանակ ապահովված չէ: Հետևաբար, ընդդիմությունը ունի մի խնդիր` հաղթել իշխանություններին մինչև ընտրությունները: Ես անձամբ եկել եմ հետևյալ եզրակացության` պիտի հաղթես մինչև ընտրությունները»:
Այս կարծիքին Սարգսյանը հանգել է՝ ելնելով արաբական երկրների փորձից։ «Երբ ժողովուրդը փողոցում էր, Մուբարաքն ասում էր` ես իմ թեկնածությունը չառաջադրեմ… Պիտի հասնել նրան, որ երբ ժողովուրդը փողոցում լինի, մինչև խորհրդարանական ընտրությունները, Հանրապետական կուսակցությունն ասի, որ ինքը` որպես կուսակցություն, այդ ընտրությանը չի մասնակցելու: Որովհետև ինքն իր մասնակցությամբ կասկած է առաջացնում երկրում արդար ընտրություններ անցկացնելու հարցում… Ես, իհարկե, չեմ հավատում, որ Հանրապետական կուսակցությունը նման բան կանի…»,– ասել է ընդդիմադիր գործիչը:
Այնուհետև Արամ Սարգսյանը հավելել է. «Ես չեմ բացառում զարգացումների նման տարբերակ: Երբ իրենք կգան ու կասեն` այ, մենք, երկիրը սիրելով, չենք մասնակցելու խորհրդարանական ընտրություններին, որ այս ժողովուրդը հավատա արդար ընտրություններին, որովհետև այս երկրի փրկությունը արդար ընտրություններն են, ինչը իրենք տարբեր ամբիոններից ասում են, այդ ժամանակ նոր ես կհավատամ իրենց ու կգնամ հերթական ընտրություններին: Հակառակ դեպքում մնացածը իմիտացիա է»:
