Դեկտեմբերի 13-ին ավարտվել են ԼՂՀ եկող տարվա բյուջեի հանձնաժողովային քննարկումները: Գլխադասային` ֆինանսաբյուջետային և տնտեսական կառավարման հարցերի մշտական հանձնաժողովի նախագահ Արպատ Ավանեսյանը այդ օրը կայացած նիստի ավարտին դրական եզրակացություն է տվել նախագծին` 2011 թվականի բյուջեն անվանելով «իրատեսական»: Համապատասխան առաջարկներից հետո Ավանեսյանն առաջարկել է ԼՂՀ ԱԺ առաջիկա լիագումար նիստում ընդունել եկող տարվա բյուջեի նախագիծը՝ որպես օրենք: Ավանեսյանը հայտարարել է նաև, որ նախագծի հետ կապված ԼՂՀ ԱԺ բոլոր պատգամավորները հանդես են եկել միասնական առաջարկով` պատգամավորի գործունեության հետ կապված ծախսերը սահմանել ոչ պակաս, քան նվազագույնն աշխատավարձի չափն է: Հիշեցնենք, որ համաձայն ԼՂՀ կառավարության կողմից խորհրդարան ներկայացված բյուջեյի նախագծի, առաջարկվում է ԼՂՀ 2011թվականի պետական բյուջեն հաստատել եկամուտների գծով՝ 60 մլրդ 857 մլն 944.3 հազար դրամ, ներառյալ ՀՀ-ից ստացվող միջպետական վարկը: Ծախսերի մասով առաջարկվել է 63 մլրդ 704 մլն 094,6 հազար դրամ: Պակասուրդը կկազմի 2 մլրդ 846 մլն 150.3 հազար դրամ: Պակասուրդը պետք է ֆինանասավորվի փոխառու զուտ միջոցներից և ֆինանսական ակտիվներից: