Շվեդ դայվերներն այս տարվա ամռանը Բալթիկ ծովում` Էլանդ կղզու ափերին, հայտնաբերել են 17-րդ դարի «Սվերդետ» ռազմանավը:
Ինչպես հաղորդվում է շվեդ սուզակների Deep Sea Productions կայքում, 50 մետրանոց «Սվերդետը» (շվեդերենից թարգմանաբար նշանակում է թուր) բավականին լավ է պահպանվել և գտնվում է Էլանդի ափերից հարավ-արևելք` 70 մետր խորության վրա:
Սուզակներն առայժմ չեն ցանկանում նշել նավի գտնվելու հստակ կոորդինատները, քանի որ վախենում են թալանից: Բացի այդ, նրանք ցանկանում են ճշտել՝ արդյո՞ք այն գտնվում է շվեդական ջրերում:
Դայվերները պատմել են, որ ռազմանավը խորտակվել է 1676 թ. հունիսի 1-ին ծովամարտի ժամանակ, երբ դանիա-հոլանդական նավատորմը պարտության է մատնել շվեդներին: Խորտակվելիս նավում եղել է 86 թնդանոթ և 600 մարդ:
