Reuters լրատվական գործակալությունը տեղեկացնում է, որ WikiLeaks-ի հիմնադիր Ջուլիան Ասանջը քննադատել է Visa, MasterCard և PayPal վճարային համակարգերին, որոնք դադարեցրել էին իր հետ համագործակցությունը: Նրա խոսքերը փոխանցել է Ասանջի մայրը, իսկ նյութն այդ մասին ցուցադրվել է ավստրալիական հեռուստատեսությամբ: «Հիմա մենք գիտենք, որ Visa, MasterCard և PayPal վճարային համակարգերը ԱՄՆ արտաքին քաղաքականության գործիքներից են: Մինչև հիմա դա անհայտ էր: Ես կոչ եմ անում համաշխարհային հանրությանը պաշտպանել իմ և իմ մտերիմների կատարած աշխատանքը անօրինական և անբարոյական գործողություններից: Իմ համոզմունքներն անդրդվելի են: Ես շարունակում եմ հավատարիմ մնալ այն իդեալներին, որոնք հռչակել եմ»,- ասել է Ջուլիան Ասանջը: Վերջին իրադարձություններն, ըստ Ասանջի, միայն ապացուցել են իր իրավացիությունը:
Ջուլիանի նշած համակարգերով գումարներ էին փոխանցվում WikiLeaks-ին: Մեկը մյուսի հետևից դրանք հրաժարվեցին WikiLeaks-ի հետ համագործակցելուց, որի արդյունքում ենթարկվեցին WikiLeaks-ին աջակցող հաքերների հարձակմանը: