ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Քեթրին Էշթոնը հույս է հայտնել, որ, չնայած Իրանի արտգործնախարարի պաշտոնանկությանը` միջազգային միջնորդների «վեցյակի» և Իրանի միջև բանակցությունների նոր փուլը հունվարի վերջին տեղի կունենա Ստամբուլում,- տեղեկացնում է РИА Новости-ն:
Իրանի հետ «վեցյակի»՝ ՄԱԿ-ի Անվտանգության խորհրդի մշտական անդամների և Գերմանիայի երկօրյա բանակցությունների առաջին փուլը դեկտեմբերի 6-7-ը տեղի էր ունեցել Ժնևում: «Ես ակնկալում եմ, որ բանակցությունները հունվարի վերջին կկայանան Ստամբուլում»,- լրագրողներին հայտնել է Էշթոնը Բրյուսելում:
Հիշեցնենք, որ Իրանի արտաքին գործերի նախարարի ժամանակավոր պաշտոնակատար է նշանակվել Ալի Աքբար Սալեհին, որը գլխավորում էր Իսլամական Հանրապետության ատոմային էներգիայի կազմակերպությունը: Մի շարք դիտորդներ այդ որոշումը գնահատում են որպես ազդանշան համաշխարհային հանրակցությանն այն մասին, որ Իրանը չի հրաժարվի միջուկային ծրագրից: