Այսօր Իտալիայի խորհրդարանը քննարկել է երկրի կառավարությանը վստահություն հայտնելու հարցը: Ըստ փորձագետների՝ ոչ մի թև խորհրդարանում չունի մեծամասնություն, այդ պատճառով քվեարկությունը կարող է լինել անկանխատեսելի:
Հռոմի փողոցներում տեղի են ունենում բողոքի ակցիաներ` ընդդեմ Բեռլուսկոնիի: Ուսանողները հայտարարում են, որ երեքշաբթին, երբ կայանալու է կառավարությանը վստահություն հայտնելու քվեարկությունը, կդառնա իտալական ժողովրդավարության հաղթանակի օրը:
Իտալիայի վարչապետ Սիլվիո Բեռլուսկոնին արդեն խոսել է իր հնարավոր հրաժարականի մասին: Նա ասել է, որ իր պարտության դեպքում Իտալիային սպասում են նոր խորհրդարանական ընտրություններ։ «Քաղաքական ճգնաժամը վերջին բանն է, որ այս պահին անհրաժեշտ է Իտալիային»,- ասել է նա` դիմելով պատգամավորներին:
Բեռլուսկոնին հայտարարել է, որ կառավարության հմուտ քաղաքականության շնորհիվ հաջողվել է խուսափել լուրջ տնտեսական ճգնաժամից: Նա խոսել է նաև Վլադիմիր Պուտինի և իր ընկերության մասին, սակայն հերքել է այդ ընկերության արդյունքում տնտեսական օգուտներ ստանալու փաստը:
Չնայած բուռն քննարկումներին` Իտալիայի խորհրդարանը, այդուհանդերձ, որոշել է վստահություն հայտնել երկրի վարչապետին: