Թուրքական Posta թերթի փոխանցմամբ՝ Թուրքիայի վարչապետ Էրդողանն իր գլխավորած «Արդարություն և զարգացում» կուսակցության (ԱԶԿ) վերջին նիստում խիստ քննադատության է ենթարկել Սիրիայի նախագահ Բաշար Ալ-Ասադին՝ կապված Սիրիայում Թուրքիայի դիվանագիտական ներկայացուցչությունների վրա իրականացված հարձակումների հետ։
Էրդողանը նշել է. «Արաբական երկրների լիգան (ԱԵԼ) պահանջել է պատժամիջոցներ սահմանել Սիրիայի ղեկավարության նկատմամբ։ Դժբախտաբար, Ասադն արաբական երկրների հետ վարվել է նույն կերպ, ինչ՝ մեզ հետ։ ԱԵԼ-ին բարեփոխումներ խոստացած Ասադը շարունակում է արյունահեղությունը։
Տեսնելով, որ Սիրիան չի կատարում տված խոստումները՝ ԱԵԼ-ը նրան արգելել է մասնակցել իր նիստերին։ Թուրքիան աջակցում է ԱԵԼ-ի այդ որոշումը։ Նոյեմբերի 12-ին հարձակման են ենթարկվել Դամասկոսում գտնվող մեր դեսպանատունն ու Հալեպում և Լաթաքիայում գտնվող հյուպատոսարանները։ Լաթաքիայում մեր դրոշի դեմ հարձակման կեղտոտ փորձ է ձեռնարկվել։
Ողջ պատմության ընթացքում թուրքական դրոշի նկատմամբ ոտնձգություն կատարածները ստացել են արժանի պատասխան։ Այդպես կլինի նաև այսուհետ։ Դու՝ Ասադ, պետք է անհապաղ գտնես ու պատժես Թուրքիայի դրոշի վրա հարձակում իրականացնողներին։
Մարդկային արժեքներին թիկունքով կանգնած Սիրիայի ղեկավարությունը չի կարող ոտքի վրա կանգնած մնալ։ Բաշար Ալ-Ասադն արդեն տեսել է նրանց ճակատագիրը, ովքեր հանդես են եկել իրենց ժողովրդի դեմ։ Խելքի եկեք, քանի դեռ ուշ չէ։ Մենք չենք ցանկանում մեր սիրիացի եղբայրների ոչնչացումը»։
