Գերմանիան ներկայացնող պրոֆեսիոնալ բռնցքամարտիկ Արթուր Աբրահամի առաջիկա որակավորման մենամարտը նախանշված է 2012 թվականի հունվարի 14-ին, Գերմանիայում: 2-3 որակավորման մենամարտ անցկացնելուց հետո բռնցքամարտիկը կրկին կհավակնի աշխարհի չեմպիոնի տիտղոսի նվաճմանը:
Ներկայում Արթուր Աբրահամն իր պրոմոութեր Վիլֆրիդ Զաուերլանդի առաջարկով և մարզական սննդաբանի խորհրդատվությամբ քաշի նվազեցման ծրագիր է անցնում, ինչը ենթադրում է և՛ սահմանափակումներ սննդակարգում, և՛ մարզումների ավելացում: Առաջիկա մենամարտի ժամանակ մարզիկը մտադիր է մրցել մինչեւ 75կգ քաշային կարգում:
Արթուր Աբրահամը համոզված է, որ 2012 թվականին կկարողանա վերանվաճել աշխարհի չեմպիոնի տիտղոսը:
«Հաղթանակները հեշտ չեն տրվում, բայց եթե աշխատասեր ես, գնում ես նպատակներիդ ետևից և անհաջողությունից չես ընկճվում, ապա հաղթանակն անխուսափելի է: Ես նորից կվայելեմ հաղթանակի բերկրանքը` ձեռք բերելով այն, ինչ կորցրել եմ»,- հայտարարում է բռնցքամարտիկը:
Արթուր Աբրահամը շարունակում է մարզչի` Ուլի Վեգների հետ նույն թիմում աշխատել: Նշենք, որ Ուլի Վեգները ևս մեծ սպասելիքներ ունի նրանից` կապված 2012-ին ռինգ վերադառնալու հետ:
Գերմանիայում մարզումներին զուգահեռ` հայ բռնցքամարտիկը զբաղվում է հասարակական ակտիվ գործունեությամբ. մասնակցում է հանրային միջոցառումներին, բարեգործական ակցիաներ է իրականացնում:
Ինչպես տեղյակ եք, մեր հայրենակիցը Հայաստանում ևս իրականացնում է նմանօրինակ միջոցառումներ. այս ամռանը Արթուր Աբրահամը 100 հազար եվրո արժողությամբ «Ադիդաս» ֆիրմայի նվերներ հանձնեց Երևանի Վլադիմիր Ենգիբարյանի անվան բռնցքամարտի օլիմպիական մանկապատանեկան մարզադպրոցին, դպրոցի սաներին և մարզիչներին, Հայաստանի բռնցքամարտի հավաքականին:
Կարիերայի ավարտից հետո Արթուր Աբրահամը մտադիր է բռնցքամարտի դպրոց բացել Հայաստանում, որտեղ սաներին կսովորեցնեն նաև օտար լեզուներ:
