ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ նոյեմբերի 12-ին Մոնրեալում մեկնարկել է «Հայաստան» համահայկական հիմնադրամի ավանդական տարեկան հանգանակությունն Ամերիկա մայրցամաքում:
Կանադայում ՀՀ դեսպանության հովանու ներքո կազմակերպված միջոցառմանը ներկա են եղել հայ համայնքային կառույցների ղեկավարները և խոշոր անհատ ձեռներեցները:
Ներկաներին մանրամասն ներկայացվել է տարիների ընթացքում իրականացված աշխատանքը, բազմաթիվ ընթացիկ ծրագրերը և դեռ չլուծված խնդիրները:
Նշվել է, որ անցյալ տարվա հանգանակության արդյունքում կառուցվել և վերանորոգվել են Արցախի ջրամատակարարման ցանցերը, ինչի շնորհիվ հազարավոր մարդկանց խմելու և ոռոգման ջրի խնդիր է լուծվել: Այս տարվա հանգանակությունը նախորդի գաղափարի շարունակությունն է լինելու:
Կանադայում ՀՀ դեսպան Արմեն Եգանյանն իր խոսքում նշել է, որ Հայաստանի, Արցախի և Սփյուռքի համատեղ ջանքերով միայն հնարավոր կլինի հաղթահարել պատմության ներկա փուլում հայ ժողովրդի առջև ծառացած մարտահրավերներն ու անլուծելի թվացող խնդիրները:
