Ազգային անվտանգության նախկին փոխնախարար Գուրգեն Եղիազարյանը, անդրադառնալով Սերժ Սարգսյանի` ՀԱՊԿ-ում ունեցած ելույթին, ասաց, թե սա խոսում է իշխանությունների երերուն վիճակի մասին: Խոսելով ՀԱՊԿ պայմանագրում և կանոնադրության մեջ կատարված փոփոխությունների մասին, Սարգսյանը կարևորել էր ճգնաժամային իրավիճակներում ՀԱՊԿ անդամ երկրների կողմից արագ արձագանքումը: «Այս տարվա գարնան-ամռան ողբերգական իրադարձություններն ի հայտ բերեցին իրավական բաց, որը փաստացի արգելափակեց ՀԱՊԿ գծով անհրաժեշտ օգնություն ցուցաբերելու հետ կապված օպերատիվ որոշում կայացնելու հնարավորությունը: Վստահ եմ, որ նման որոշումների կայացման գործող մեխանիզմի առկայությունը, նախազգուշական արձագանքման մեխանիզմի հետ մեկտեղ, թույլ կտա ապահովել Կազմակերպության ներուժի իրականացումը ճգնաժամային իրավիճակի ամենավաղ փուլում` չթողնելով, որ այն անցնի ակտիվ փուլի»,- հայտարարել էր նա:
Ազգային անվտանգության նախկին փոխնախարար Գուրգեն Եղիազարյանը, անդրադառնալով այդ ելույթին, ասաց, թե սա խոսում է իշխանությունների երերուն վիճակի մասին. «Սա խայտառակություն է: Ղրղզստանում արյունահեղությունը սկսվեց մեկ այլ բանից, վերածվեց մեկ ուրիշ բանի: Սկսվեց սոցիալական խստագույն պատճառներից, այսինքն` սովից, և այդ ամենը շուռ տվեցին ազգային հողի վրա` ավարտվելով ուզբեկների ջարդով: Մենք չունենք այդպիսի ազգային փոքրամասնություն, ինչի մասին է ուրեմն խոսքը: Ի՞նչ ղրղզական տարբերակ, ի՞նչ ղրղզական փորձ»։ Գուրգեն Եղիազարյանը ասաց, որ Հայաստանում չկա ուզբեկ փոքրամասնություն, որի վրա կարող են հարձակվել, և որին պետք է պաշտպանել, այլ կա մեծամասնություն կազմող ժողովուրդ, որն ատում է այս իշխանություններին:
