2010-2029 թթ. ընկած ժամանակահատվածում համաշխարհային ավիացիոն շուկային անհրաժեշտ կլինի 26 հազար նոր ինքնաթիռ` 100 ուղևորից ավելի հնարավորությամբ: Այս մասին հայտնում է եվրոպական ինքնաթիռաշինության Airbus ընկերությունը:
Այդ ծավալներն ապահովելու համար անհրաժեշտ կլինի 3,2 տրլն դոլար: Մի տարի առաջ այդ թվերը ցածր էին` 25 հազար նոր ինքնաթիռ` 3.1 տրլն դոլար ընդհանուր արժողությամբ:
Նման աճը կապված է զարգացող երկրներում` Հնդկաստանում, Չինաստանում, փոխադրումների աճի հետ: Բացի այդ, Airbus-ում հույս ունեն, որ ավիափոխադրողները կփոխարինեն իրենց ինքնաթիռներն ավելի արդյունավետ տարբերակներով:
Եվրոպական ինքնաթիռաշինական ընկերությունում կարծում են, որ պետք կգա 250-400 տեղ ունեցող 6,240 ինքնաթիռ: Դրանցից 4,330 կլինեն 250-300 տեղ ունեցողները: Ինչ վերաբերում է տեղափոխելու ավելի քիչ հնարավորություն ունեցող ինքնաթիռներին, ապա դրանց թիվը կհասնի 17,9 հազարի: Airbus A380-ի պահանջարկն էլ կլինի1,7 հազարի սահմաններում:
Airbus-ի հաշվարկներում ներառված են թե´ ուղևորատար, և թե´ բեռնատար ինքնաթիռները:
Ինչպես նշում է Agence France-Presse-ը, Airbus-ի հիմնական հակառակորդ համարվող Boeing-ը ունի ավելի լավատեսական հաշվարկներ: Ըստ այդմ՝ մինչև 2029 թ. անհրաժեշտ է ավելի քան 30.9 հազար ինքնաթիռ` 3.59 տրլն դոլար ընդհանուր արժողությամբ:
