Ֆրանսիայի մայրաքաղաք Փարիզում ավարտվեց ծանրամարտի 2011թ. Աշխարհի առաջնությունը: Առաջնության վերջին օրը՝ նոյմբերի 13-ին, մրցահարթակ դուրս եկան մեր հավաքականի 2 ներկայացուցիչներ՝ Հռիփսիմե Խուրշուդյանն ու Ռուբեն Ալեքսանյանը:
75+ քաշային կարգում հանդես եկող Հռիփսիմե Խուրշուդյանը պոկում վարժությունում հաջող կատարեց իր առաջին մոտեցումը՝ բարձրացնելով 125 կիլոգրամանոց ծանրաձողը: Երկրորդ մոտեցման ժամանակ (ծնրաձողի քաշը՝ 130 կգ) Հռիփսիմեն ստացավ ձախ ձեռքի արմունկային հոդի հոդախախտ և չշարունակեց պայքարը:
Այս առաջնությունում Հայաստանի հավաքականի 4-րդ 0-ն հրում վարժությունում ստացավ գերծանր քաշային Ռուբեն Ալեքսանյանը՝ տխուր վերջակետ դնելով մեր հավաքականի համար արդեն տապալված առաջնությանը:
Այսպիսով՝ Հայաստանի հավաքականի միակ մեդալը նվաճեց Տիգրան Պետրոսյանը՝ պոկում վարժությունում արժանանալով փոքր բրոնզե մեդալի: