Եվրամիությանը և ԱՄՆ-ին «անցանկալի անձանց» ցուցակ ներկայացնելու վերաբերյալ ՀՀՇ նախաձեռնությանը միացել է նաև «Իրավունք և ազատություն» կենտրոնի իրավապաշտպան Վարդան Հարությունյանը:
Հարությունյանը մեզ հետ զրույցում նշեց, որ բոլոր նրանք, ովքեր իրենց համաձայնությունն են տալիս մասնակցելու քաղաքական հալածանքներին, կլինեն դրանք` քննիչներ, պաշտոնատար անձինք, դատախազներ, թե դատավորներ, պետք է իմանան, որ մի օր դրա համար պատժվելու են: Վարդան Հարությունյանը կոնկրետ անուններ չնշեց, սակայն ասաց, որ բոլորն հավասար են օրենքի պահանջների առջև. «Ցուցակ որևէ մեկը չի էլ կազմել, ցուցակը հայտնի է: Երբ որ այս իշխանությունները Մարտի մեկի գործով մեղադրական եզրակացություններ են ներկայացրել, նրանք արդեն քրեական գործ հարուցելուց ներգրավել են այն բոլոր մարդկանց, ովքեր, որ պետք է աշխատեն իրենց համար: Բոլոր նրանք, ովքեր ներգրավված են քրեական գործերում որպես մեղադրողներ, որպես քննիչներ, որպես օպերատիվ աշխատակիցներ, պետք է պատասխան տան և՛ Հայաստանում, և՛ Հայաստանից դուրս»:
Հարցին, թե բացի իրավապահ մարմինների աշխատակիցներից, արդյոք իշխանությունները չե՞ն ընդգրկվելու «անցանկալի անձանց» ցուցակում, Վարդան Հարությունյանը պատասխանեց. «Հերթը նրանց նույնպես կհասնի, սակայն դեռևս մենք միայն քրեական գործի շրջանակներում ներգրավվածների վերաբերյալ ենք ծավալում մեր գործունեությունը»:
Հարությունյանի գնահատմամբ, այս նախաձեռնությանը միջազգային հանրությունը արձագանքելու է, քանզի այս կարգի քաղաքական հետապնդումները ամբողջ աշխարհի համար են դառնում պրոբլեմ: