Բավական ժամանակ է, ինչ տրված է խաշի սեզոնի մեկնարկը: Մեզանում շատերն են մեծ խանդավառությամբ սպասում խաշի սեզոնի բացմանը, սեղանի շուրջ մտերմիկ միջավայրում հաճելի ժամանակ անցկացնելուն:
Ժողովրդի շրջանում տարածված մտայնության համաձայն` խաշն օգտակար է հատկապես կոտրվածքների ժամանակ` իբր նպաստում է կոտրվածքները արագ վերականգնելուն: «Առաջին լրատվական»-ը փորձեց վնասվածքաբանից պարզել` օգտակա՞ր է արդյոք խաշը կոտրվածք ունեցող հիվանդներին:
«Էրեբունի» բժշկական կենտրոնի կլինիկական օրդինատոր, վնասվածքաբան-օրթոպեդ Արթուր Աղամիրյանը մեզ հետ զրույցում ասաց, որ խաշը հիվանդներին խորհուրդ չի տրվում, որոշ դեպքերում անգամ արգելվում է, քանի որ այն դժվարամարս սնունդ է ու կոտրվածքներ ունեցող, քիչ շարժունակ հիվանդներին խորհուրդ չի տրվում օգտագործել:
«Պառկած վիճակում գտնվող հիվանդներին, որոնք ոտք են կոտրել կամ քիչ են շարժվում, խորհուրդ չի տրվում այն օգտագործել: Սուտ են կոտրվածքներ ունեցող հիվանդների համար խաշի օգտակարության մասին լուրերը»,- ասաց բժիշկը:
Վերջինիս խոսքով` խաշը, որպես սովորական սնունդ, կարող են օգտագործել ինչպես հիվանդները, այնպես էլ առողջները: Խաշի մեջ պարունակվող տարրերը էական ոչ մի ազդեցություն չեն կարող ունենալ կոտրվածքներ ունեցող հիվանդների վրա:
«Կոպիտ ասած` դրա օգտագործումը հիվանդի շուտ լավանալու համար եղած-չեղած մի հաշիվ է»,- նկատեց վնասվածքաբան-օրթոպեդը:
Ինչ վերաբերում է խաշի մեջ մեծ քանակությամբ խոլեստերինի պարունակությանը, ապա բժշկի կարծիքով, այն օրգանիզմին շատ պետք է, սակայն խոլեստերինի մեծ քանակությունը վնասակար է օրգանիզմին:
«Խաշն իր մեջ պարունակում է խոլեստերինի մեծ քանակություն, ու եթե հիվանդն ունի ճարպակալման հետ կապված խնդիր, նրանց խորհուրդ չի տրվում խաշ օգտագործել, քանի որ նրանց մոտ առանց այդ էլ նյութափոխանակությունը խանգարված է»,- նշեց Ա. Աղամիրյանը:
