Բնապահպանները բոյկոտում են «Ընդերքի մասին» օրենքի փոփոխությունները: Այն, ինչ տիրում է այսօր, կկրկնապատկվի այն դեպքում, երբ այս օրենքն ընդունվի: «Առաջին լրատվական»-ի հետ զրույցում բնապահպանական հասարակական կազմակերպությունների նախագահները մտահոգություն հայտնեցին, որ օրինագծի ընդունման դեպքում կկրկնապատկվեն այն ռիսկերը այս ոլորտում, որ կան այսօր, և այս ոլորտն առավել գրավիչ կդառնա հանքարդյունաբերողների համար`այդպիսով պարունակելով մի շարք սպառնալիքներ:
«Պարզ է, որ հանքարդյունաբերությամբ զբաղվող բիզնեսմենների համար այս օրենքը գտնված կարելի է համարել»,- ասաց բնապահպաններից մեկը`հավելելով, որ այս օրենքի կիրառմամբ կավելանան այն խախտումները, որոնք թույլ են տալիս հանքարդյունաբերողները: Բնապահպանների համոզմամբ`Հայաստանում շատ էկոլոգիական խնդիրներ առաջանում են հենց հանքարդյունաբերության պատճառով:
Էներգետիկայի նախարար Արմեն Մովսիսյանը, ներկայացնելով օրինագիծը, նշել էր, որ օրենսգրքում փորձ է արվել կիրառել մեկ պատուհանի սկզբունքը` ընդերքօգտագործման տրամադրման գործընթացը հնարավորինս պարզեցնելով: «Բոլոր տիպի օգտակար հանածոների համար սահմանվում է ընդերքօգտագործման իրավունքի տրամադրման նույն մոտեցումը:
Նախագծում վերանայվել է երկրաբանական տեղեկատվության տրամադրման կարգն ընդերքօգտագործողներին. այն կլինի անվճար»,- նշել էր նախարարը: Այս վերանայմանն են դեմ բնապահպանները:
Տեղեկացնենք, որ «Ընդերքի մասին» օրենքը արդեն անցել է ԱԺ երկրորդ ընթերցումը և ԱԺ Տնտեսական հարցերի հանձնաժողովի կողմից դրական եզրակացություն է ստացել: