Հայաստանում ներկայումս հաշվառված է մոտ 6 հազար կույր, իսկ հաշմանդամների ընդհանուր թիվը ավելի քան 170 հազար է` ՀՀ ամբողջ բնակչության գրեթե 7-8 տոկոսը: Այսօր կայացած մամլո ասուլիսի ժամանակ այս մասին հայտարարեց «Հարմոնիա» ՀԿ նախագահ, ՀՀ նախագահի աշխատակազմի աշխատակից Ալբերտ Աբգարյանը։
Նրա խոսքով՝ կույր մարդկանց խնդիրները շարունակում են արդիական մնալ և վերջին մեկ տարում դրանց լուծման ոլորտում էական առաջընթաց չի գրանցվել: «Շոշափելի փոփոխություններ և էական առաջընթացներ խնդիրների կարգավորման բնագավառում չեն եղել: Իսկ խնդիրները բազմաթիվ ու բազմազան են` սկսած զբաղվածության հարցից, հատուկ գրականության պակասից, վերջացրած կույրերի համար չլուծված մնացող տրանսպորտային խնդիրներով: Եթե անգամ որոշակի ծրագրեր են իրականացվում, ապա բացառապես մեր` կույրերիս միջոցների և ռեսուրսների հաշվին»,- նկատեց Ալբերտ Աբգարյանը:
Նա, սակայն, կույրերի խնդիրներից ամենակարևորը համարեց գործազրկության բարձր մակարդակը`որպես առաջին պատասխանատու այդ հարցում նշելով Աշխատանքի և սոցիալական հարցերի նախարարությանը: «Հայաստանում աշխատանք ունեցող կույր մարդկանց կարելի է մատների վրա հաշվել: Նրանք այնքան քիչ են, որ նույնիսկ որոշակի տոկոս չեն կազմում: Ես ցավով եմ նշում, որ պետական ապարատում աշխատող տեսողության խնդիր ունեցող միակ մարդն եմ: Թեպետ այնտեղ որպես իրավաբան եմ աշխատում, սակայն ձգտում եմ հնարավորինս բարձրաձայնել կույրերի խնդիրների մասին: Մինչդեռ պետությունը պետք է խրախուսի գործատուին, որպեսզի վերջինս խնդիրներ չունեցող մարդկանց զուգահեռ` աշխատանքի վերցնի նաև կույրերին: Դրա համար, օրինակ, նման գործատուների համար անհրաժեշտ է հարկային արտոնություններ սահմանել: Պարզապես օրենսդիրը լավ է հասկանում, որ այդ դեպքում բյուջետային ինչ-ինչ խնդիրներ կծագեն, և այդ պատճառով էլ նման քայլի չի գնում»,- կարծիք հայտնեց «Հարմոնիա» ՀԿ-ի նախագահը:
Նա կարևոր խնդիր համարեց կույրերի` կրթություն ստանալու առնչությամբ ի հայտ եկող դժվարությունները: «Ճիշտ է, պետությունը առաջին և երկրորդ խմբի հաշմանդամներին հնարավորություն է ընձեռում անվճար ուսանել, սակայն չլուծված են մնում հատուկ` մասնագիտական, և գեղարվեստական գրականության հարցերը: Կույրերի խնդիրները պետք է բոլորի խնդիրները լինեն, իհարկե` պետության գլխավորությամբ»,- շեշտեց Ալբերտ Աբգարյանը:
Ամփոփելով`«Հարմոնիա» ՀԿ նախագահը նշեց, որ իրենց խնդիրների մասին բազմիցս բարձրաձայնել են նաև հայաստանյան քաղաքական ամենատարբեր ուժերի ներկայացուցիչների հետ, վերջիններս նույնիսկ իրենց նախընտրական ծրագրերում են անդրադարձել դրանց, սակայն` ապարդյուն:
