«Պայքարենք Թռչկանի ջրվեժի համար» նախաձեռնության ներկայացուցիչները այսօր՝ Մարիամ Սուխուդյանի գլխավորությամբ հրավիրված ասուլիսին ներկայացել էին սափրած գլուխներով:
Պարզաբանելով մազերը սափրելու պատճառը՝ Սուխուդյանը նշեց, որ Թռչկանի համար պայքարը ծոմի նման մի բան էր, որին միացողները կիմանան: Պայքարի վերջում մի բան էր հղիացել նրանց մեջ, և եկել էր զոհաբերելու պահը, բայց ոչ թե գառ են մորթել, արյուն թափել, այլ իրենց քողն են տվել մայր բնությանը և դրա հետ վերածնվել: Սուխուդյանը միանշանակ նկատեց, որ ավելի է արմատականացել և մեծ պոտենցիալով է շարունակելու իր պայքարը:
Ասուլիսին հրավիրված էին նաև բնապահպաններ Գևորգ Վարդանյանը և Եղիա Ներսիսյանը: Գ.Վարդանյանը նկատեց, որ ինչու չէ՝ իրենք սափրագլուխ բնապահպաններ են, ովքեր կպայքարեն նրանց դեմ, ով կփորձի վնասել բնությանը: Արձագանքելով լրագրողների հարցին, մասնավորապես այն հանգամանքին, որ ՀԱԿ-ը կոչով դիմել է և իր աջակցությունը հայտնել Թռչկանին՝ նշեց, որ իրենք քաղաքացիական նախաձեռնություն են և ոչ քաղաքական: Եղիա Ներսիսյանն ավելացրեց, որ ՀԱԿ-ը իր հայտարարությամբ ցանկանում է իրենց վերցնել իր շվաքի տակ՝ ասելով, որ իրենք չեն ցանկանում որևէ քաղաքական ուժի հետ միանալ: Սուխուդյանը հավելեց, որ Րաֆֆի Հովհաննիսյանը, Զարուհի Փոստանջյանը ևս այցելել են իրենց, բայց այդ այցը նույնպես քաղաքացիական բնույթ է կրել: Եղիա Ներսիսյանը ավելացրեց, որ պայքարի ընթացքում իրենց ոգին ամուր է պահել գիշերային խարույկը՝ հայրենասիրական երգերի ուղեկցությամբ:
Հիշելով պայքարի մանրամասները՝ նրանք նշեցին, որ կանգնել են տեխնիկայի առաջ և առաջարկել իրենց վրայով անցնել՝ միաժամանակ երգելով հայրենասիրական երգեր: Այնուհետև նշեցին, որ Թռչկանը փրկելով իրենց պայքարը չի ավարտվել և շարունակելու են նույն ոգով փրկել բնապահպանական մյուս արժեքները, որոնք վտանգված են: Օրինակ՝ այսօր նրանք գնալու են Հրազդան ավելի մոտիկից ծանոթանալու տեղանքին և բնակչությանը՝ հավաստելով, որ պատրաստվում են պայքարել չինացիների կողմից երկաթահանքի շահագործման դեմ:
Վերջում նրանք ասուլիսը փակեցին Թռչկանի հիմնով՝ «Հայեր միացեք, միացեք հայեր, Թռչկանն է ձեզ կանչում, օգնության հասեք: Դեռ ճամփա ունենք, պիտ հասնենք Շաքի, ու թող Ռոքվինը մեջտեղից ճաքի: Ուս ուսի տված առյուծի նման քանդեցինք ՀէԿ-ը հուր ու հավիտյան»:
