Այսօր Երևանի «Կոնգրես» հյուրանոցում մեկնարկեց Թալիշագիտական երկրորդ միջազգային գիտաժողովը: Այն Iran and the Caucasus միջազգային գիտական ամսագրի 15-ամյակին նվիրված և նրա կողմից իրականացվող հերթական գիտական միջոցառումն է, որին աջակցում են «Մոդուս Վիվենդի» կենտրոնը, Իրանագիտական կովկասյան կենտրոնը, Թուրքիայի, Իրանի և Կովկասի ուսումնասիրությունների միջազգային ասոցիացիան և ARMACAD-ը:
Գիտաժողովի բացմանը հանդես եկան պրոֆ. Գ. Ասատրյանը՝ «Թալիշագիտության արդի խնդիրների և դրա հեռանկարների շուրջ», պրոֆ. Ա. Գրանմայեն՝ «Ինչպես փրկել թալիշների լեզուն և մշակույթը», հայտնի պատմաբան և գրող Քավե Ֆարրոխը` «Կովկասյան Ադրբեջանի ապաիրանականացման գործընթացը» զեկույցներով: ԵՊՀ իրանագիտության ամբիոնի դոցենտ Վ. Ոսկանյանը կներկայացնի նոր թալիշական այբուբենի նախագիծը`ավեստային գրի հիման վրա:
Գիտաժողովին, բացի հայ գիտնականներից, մասնակցում են նաև հայտնի մասնագետներ Ռուսաստանից, Իրանից Վրաստանից, Նիդեռլանդներից, ԱՄՆ-ից և Կանադայից: Գիտաժողովի համար ԵՊՀ իրանագիտության ամբիոնը պատրաստել է «Թալիշ ժողովրդի պատմության և մշակույթի ներածություն» կոլեկտիվ մենագրությունը` պրոֆ. Գ. Ասատրյանի խմբագրությամբ: Մենագրությունը ներառում է 10 գլուխ, որոնցից յուրաքանչյուրն անդրադառնում է Թալիշստանի բնակչության, բնական ռեսուրսների, կրոնի և հավատալիքների, ժողովրդական արվեստի, լեզվի ու գրականության հարցերին:
Նշենք, որ Թալիշագիտական առաջին գիտաժողովը տեղի է ունեցել վեց տարի առաջ՝ Ծաղկաձորում, որն արժանացել է միջազգային ակադեմիական շրջանակների բարձր գնահատականին: Կազմակերպիչները հույս ունեն, որ այս գիտաժողովը նույնպես բարձր կգնահատվի: Այ տևելու է երկու օր: