Ինչպես հաղորդում է Коммерсант թերթը, Թուրքմենստանը, Աֆղանստանը, Պակիստանը և Հնդկաստանը ստորագրել են պայմանագիր, որով կկառուցվի տրանսաֆղանական գազամուղ: Թերթը եզրակացնում է, որ այս ծրագիրը կնվազեցնի Ռուսաստանը շրջանցող Nabucco գազամուղի կառուցման հավանականությունը, քանի որ Թուրքմենստանն այլևս շահագրգռված չի լինի դրանում և չի էլ կարող ապահովել երկու մեծ ծրագրերի գազային պաշարները:
Միաժամանակ թերթը նշում է, թե ծրագրի իրագործման համար, սակայն, կոնկրետ ժամկետներ չեն նշվում:
Որոշ փորձագետներ նշում են նաև, որ ծրագիրը դժվար իրագործելի է այն պարզ պատճառով, որ անցնելու է Աֆղանստանի տարածքով, որն այս պահին գտնվում է ծայրահեղ անկայում իրավիճակում, իսկ կարգավորման նախադրյալներ դեռ չկան:
«Առաջին լրատվականն» արդեն տեղեկացրել է, որ Թուրքմենստանն սկսել է մտածել աֆղանական ուղղությամբ գազ արտահանելու մասին այն բանից հետո, երբ Ռուսաստանն այս տարի հայտարարել էր կենտրոնասիական այդ երկրից գազի գնումների կրճատման մասին:
Ըստ նախնական ծրագրի, «աֆղանական գազամուղի» երկարությունը կկազմի 1700 կմ, ամեն տարի այն հնարավորություն կունենա Պակիստան, Աֆղանստան և Հնդկաստան հասցնել մինչև 33 մլրդ խորանարդ մետր գազ (14-ական մլրդ խորանարդ մետր գազ Պակիստանն ու Հնդկաստանը, 5 մլրդ` Աֆղանստանը): Նախնական գինը կկազմի 4 մլրդ դոլար:
