Այս պահին ՀՀ կառավարության շենքի մոտ բողոքի ակցիայով հանդես են գալիս Հրազդան քաղաքի բնակիչները: Նրանք պահանջում են վերանայել սույն թվականի փետրվարի 5-ին կայացրած որոշումը, որով Արտավազդ գյուղական համայնքում գտնվող շուրջ 85 հեկտար հողատարածքը պետք է օգտագործվի հանքային ջրերի գործարան կառուցելու նպատակով:
«Մենք պահանջում ենք հեռու մնալ այդ հողերից, մասնավորապես Սասուն Միքայելյանի 1.5 հեկտարից հեռու կանգնել: Մենք նամակ եք ուղղել կառավարությանը, մոտ 20 օր առաջ, սպասում ենք. եթե բացասական լինի պատասխանը, մենք կդիմենք ՀՀ նախագահ Սերժ Սարգսյանին և նրանից կպահանջենք կասեցնել որոշումը: Մենք թույլ չենք տա հող խլել նրանից, ով ինքն է հողեր ազատագրել, դա անթույլատրելի է»,-մեզ հետ զրչույցում նշեց ակցիայի կազմակերպիչ` Թագուհի Թովմասյան:
Ակցիայի մասնակիցները Ռուսաստանի հայերի միության հախագահ` Արա Աբրահամյանից, ում հովանու ներքո է կառուցվելու գործարանը, պահանջում են հեռու մնալ Արտավազդ գյուղի հողերից:
«Նրանք ցանկանում են հանքային ջրերի գործարան կառուցել, բայց այդ նույն հատվածում արդեն կա հանքային ջրերի գործարան, որը չի գործում, և եթե նրանք իսկապես բուռն ցանկություն ունեն հանքային ջրերի գործարան կառուցելու, կարող են օգտագործել գյուղի գործարանը: Խոսակցություներ կան նաև, որ զվարճանքի քաղաք են պատրաստվում սարքել, որը չի համապատասխանում կառավարության որոշմանը: Կարծում եմ, որ այս ամենը արվում է Սասուն Միքայելյանից հողատարածք խլելու համար»,-ավելացրեց Թագուհին: