ԱՄՆ-ը առաջին անգամ հրապարակել է նախկին նախագահ Ռիչարդ Նիքսոնի` 1975 թ. ատենակալների դատարանին տված ցուցմունքը: Ձայնագրության սղագրությունը տեղադրված է պաշտոնական փաստաթղթերի հրապարակմամբ զբաղվող գերատեսչության կայքում:
Հիմնականում Ուոթերգեյթի սկանդալին վերաբերող այդ վկայությունները Նիքսոնը տվել է 1975 թ. հունիսի 23-24-ը: ԻՆչպես հաղորդում է The New York Times պարբերականը, նախկին նախագահը, ամենայն հավանականությամբ, հույս ուներ, որ դրանք երբեք չեն հրապարակվի:
Նիքսոնն իր ցուցմունքում (նա այդ ժամանակ արդեն լքել էր նախագահական աթոռը) փորձում է իրեն ներկայացնել որպես մրցակիցների զոհ, որոնք իր դեմ պայքարում օգտագործել են պետական գերատեսչությունները: Մասնավորապես՝ նրա խոսքերով, դա տեղի է ունեցել Ջոն Քենեդու նախագահության տարիներին:
Նիքսոնը պատմել է, որ երբ ինքն առաջադրվում էր Կալիֆոռնիայի նահանգապետի պաշտոնում, իրեն վարկաբեկելու համար օգտագործում էին հարկային գերատեսչությունը: Բացի այդ, Նիքսոնը պատմել է, որ FBI ղեկավար Էդգար Հուվերը մի անգամ խոստովանել է, որ նրա ինքնաթիռում լսող սարք են տեղադրել:
Լրագրողները նշում են, որ ձայնագրության մեջ Նիքսոնը քաղաքականության մասին խոսում է ակնհայտ ցինիզմով:
Վկայությունը հրապարակվել է դատարանի կարգադրությամբ: Համապատասխան հայց էր ներկայացրել Սթենլի Քաթլերը, որը մի քանի գիրք էր գրել Նիքսոնի նախագահության և Ուոթերգեյթի սկանդալի մասին: Ձայնագրության որոշ մասեր առայժմ չեն հրապարակվում, քանի որ պարունակում են գաղտնի տեղեկություն:
Ռիչարդ Նիքսոնը եղել է ԱՄՆ միակ նախագահը, որը հրաժարական է տվել (դա եղել է 1974 թ. օգոստոսի 9-ին): Այդ քայլին նա ստիպված էր գնալ իմփիչմենթի սպառնալիքի պատճառով, քանի որ կասկածներ կային, որ 1972 թ. հունիսին Նիքոսոնը խոչընդոտել է Վաշինգտոնի Ուոթերգեյթ հյուրանոցում` Դեմոկրատական կուսակցության գրասենյակում, «լսող սարքեր» տեղադրման գործի հետաքննությանը:
