Ռուսական Regnum լրատվական գործակալության փոխանցմամբ՝ Մեծի Տանն Կիլիկիո կաթողիկոս Արամ 1-ինը նամակ է հղել ԱՄՆ պետքարտուղար Հիլարի Քլինթոնին, որում կոչ է արել հետևողական լինել քրիստոնյաների ունեցվածքը թուրքական իշխանությունների կողմից վերադարձնելու հարցում։
Իր նամակում Արամ 1-ինն ընդգծել է, թե իր ամերիկյան վերջին այցի ժամանակ տեղեկացել է, որ պետքարտուղար Քլինթոնը սեպտեմբերի 14-ին նամակ է հղել թուրքական իշխանություններին, որում կոչ է արել վերադարձնել կրոնական փոքրամասնությունների ունեցվածքը։
Արամ 1-ինը Քլինթոնի այդ քայլը որակել է որպես բավական համարձակ՝ հաշվի առնելով Թուրքիային առնչվող ԱՄՆ-ի շահերը։
Նշվում է, որ սեպտեմբերի սկզբին էլ նմանատիպ նամակ Թուրքիայի վարչապետ Էրդողանին հղել էր Արամ 1-ինը, սակայն նրա նամակն անպատասխան էր մնացել։
Հիշեցնենք, որ այս տարվա օգոստոսին Թուրքիայի վարչապետ Թայիփ Էրդողանը հրամանագիր էր ստորագրել, որով նախատեսվում էր հետ վերադարձնել 1936 թվականից հետո երկրի ոչ մուսուլման փոքրամասնություններից խլված կրոնական ունեցվածքը: