Թուրքական Dünya Bülteni կայքի փոխանցմամբ՝ ամերիկյան Predator («Գիշատիչ») տիպի 4 անօդաչու հետախուզական ինքնաթիռները ժամանել են Թուրքիայի հարավարևելյան հատվածում ընկած Ինջիրլիքի ավիաբազա։
Նշվում է, որ թեև ԱՄՆ-ը Թուրքիայի խնդրանքով կարող է օդ բարձրացնել այդ Predator-ները, սակայն Թուրքիան իրավունք չունի լուսանկարելու, իսկ թուրքական անձնակազմն էլ իրավունք չունի սպասարկելու դրանց։ Բացի այդ, Թուրքիան իրավունք չունի դրանք գործածել երրորդ երկրի դեմ։ Predator-ների թռիչքի արագությունը կազմում է 180-200 կմ/ժամ, իսկ բարձրությունը՝ 13-14,000 ոտնաչափ։ Predator-ներն այդ բարձրության վրա կարող են մնալ 20-24 ժամ։
Հիշեցնենք, որ սեպտեմբերի վերջին թուրքական լրատվամիջոցները գրեցին, որ Թուրքիան ու ԱՄՆ-ը պայմանավորվել են Predator անօդաչու հետախուզական ինքնաթիռների տեղափոխման շուրջ։
Ըստ դրա՝ Իրաքից ամերիկյան զորքերի դուրսբերումից հետո Predator անօդաչու հետախուզական ինքնաթիռները տեղափոխվելու են Թուրքիա և տեղակայվելու են Ինջիրլիքի ամերիկյան ռազմաբազայում։
Դրանք հետախուզական նպատակներով գործածվելու են Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) դեմ պայքարում։
