ՀՀՇ վարչության նախագահ Արամ Մանուկյանը տեղեկացրեց, որ ՀՀՇ-ն սկսել է մի գործընթաց, որի արդյունքում կպատժվեն բոլոր նրանք, ովքեր մեղավոր են քաղբանտարկյալների նկատմամբ անարդար վճիռներ կայացնելու մեջ:
«Քաղաքական գործունեություն ծավալելու, քաղաքական կարծիք ունենալու համար մարդը որակվել է որպես կրիմինալ հանցագործ և քրեական հոդվածներ է ստացել: Միջազգային կառույցների որոշումները և հայտարարություններն էլ են հաստատում, որ Հայաստանում կան քաղբանտարկյալներ: Մենք հիմնվում ենք բոլոր այդ միջազգային կառույցների գնահատականների վրա, դատական գործերի վրա, որոնք «թխվել» են քաղբանտարկյալների համար և որոնց մեծ մասն այսօր եվրոպական դատարանում են: Բոլոր այն մարդիկ, ովքեր մարտի 1-ի համար կեղծ վկայություն են տվել` մեղավոր են, պետք է եվրոպական կառույցների և ԱՄՆ-ի կողմից այդ երկրներ մուտք գործելու մերժում ստանան»,- մանրամասնեց Արամ Մանուկյանը: Նրա խոսքերով, այս գործընթացին հաջորդելու են նաև այլ քայլեր, ինչպես, օրինակ, արտասահմանում ունեցած սեփականության նկատմամբ կալանքի կիրառումը: Մանուկյանը տեղեկացրեց, որ բոլոր այն դատավորները, ովքեր քաղբանտարկյալների նկատմամբ անարդար վճիռ են արձակել, մտնում են իրենց կազմած ցուցակի մեջ. «Սա քաղաքական ակցիա է, կարծում եմ՝ աղմկոտ ակցիա կլինի, եթե եվրոպական երկրները հայտարարեն, որ այդ մարդիկ ցանկալի անձ չեն իրենց երկրներում։ Մի կարծեք, որ դա թույլ պատժամիջոց է»:
Արամ Մանուկյանը տեղեկացրեց, որ անօրինական գործունեություն ծավալած անձանց ցուցակը, որն ուղարկվելու է եվրոպական կառույցներին և ԱՄՆ-ին, կազմվել է «Իրավունքի և ազատության» կենտրոնի իրավապաշտպան Վարդան Հարությունյանի հետ համատեղ: Մանուկյանի խոսքերով, իրենք դիմելու են ՀՀՇ-ի գործընկեր եվրոպական լիբերալ կուսակցություններին, որպեսզի իրենց ներկայացրած «անցանկալի անձանց» ցուցակն այնտեղ անցկացվի: Ինչպես նաև դիմելու են Եվրոպական խորհրդարանին և ԱՄՆ Կոնգրեսին:
