Երգիչ Ֆիլիպ Կիրկորովը հեռուստառեժիսոր Մարինա Յաբլոկովայի վրա հարձակում գործելու համար պատրաստ է կրել իր պատիժը` մասնակցելով հասարակական աշխատանքների: Նա այդպիսի հայտարարություն է արել НТВ- հեռուստաընկերության եթերում:
«Ոչ առաջինն եմ, ոչ էլ վերջինը, ուղղակի այնպես է ստացվում, որ մեր երկրում իմ օրինակով արվեստագետը արդեն կարող է գնալ հասարակական աշխատանքների», – հայտնել է Ֆ.Կիրկորովը:
Երգիչը նշել է, որ իր համար ամենասարսափելի պատիժը կարող է լինել ելույթ ունենալու հնարավորությունից զրկվելը: «Եթե ինձնից վերցնեն բեմը, ես միանգամից կմահանամ»,- խոստովանել է նա:
Ավելի վաղ հայտնի էր դարձել, որ Ֆ.Կիրկորովը և Մ.Յաբլոկովան համաձայնության են եկել հաշտվել: Այդ համաձայնությունը կստորագրվի մոտ ժամանակներս: Նախնական տեղեկություններով Կիրկորովի կողմից «բավականաչափ դրամական փոխհատուցումը» կուղղվի Չուլպան Խամատովայի բարեգործական հիմնադրամ:
Հիշեցնենք, որ ռուսական բեմի աստղը ծեծի էր ենթարկել Յաբլոկովային այն բանի համար, որ նա ուժեղ լուսարձակն ուղղել էր Կիրկորովի աչքերի մեջ: Բժիշկները տուժածի մոտ հայտնաբերել էին ուղեղի ցնցում և բազմաթիվ կապտուկներ:
Այն բանից հետո, երբ այդ կինը դիմում բողոք էր գրել ոստիկանություն, Կիրկորովը անհապաղ ուղևորվել է Իսրայել բուժում ստանալու համար: Հիվանդանոցում նա զննում է անցել: Բժիշկները հոգեկան որևէ խանգարում և շեղում չեն գտել, սակայն ինքը՝ երգիչը, նշում էր, որ Մ. Յաբլոկովայի վրա հարձակվելու պատճառ է հանդիսացել իր վատառողջ լինելու հանգամանքը:
Այս մասին հաղորդում է RBC-ն: