Թուրքական Sabah թերթի փոխանցմամբ՝ Հայոց եկեղեցին պահանջում է վերադարձնել 755 տարվա վաղեմություն ունեցող ձեռագիր ավետարանի 7 էջերը, որոնք ժամանակին Զեյթունից տարվել են Լոս Անջելեսի Գետիի թանգարան։
Այս նպատակով Մեծի Տանն Կիլիկիո կաթողիկոսությունը դատական հայց է ներկայացրել Գետիի թանգարանի դեմ։ Փաստաբան Վարդգես Եղիայանը հայտնել է, որ այդ դատական հայցը բացվել է 2010 թվականի հունիսին, և վերջին դատալսումը տեղի է ունեցել հոկտեմբերի 31-ին, որում պահանջել են իրենց իրավունքների ճանաչումն այդ ավետարանի 7 էջերի նկատմամբ, որոնք Գետիի թանգարանին են վաճառվել 1994 թվականին։
Ընդգծելով, որ հաջորդ դատալսումը տեղի է ունենալու 2012 թվականի մայիսին՝ Եղիայանը նշել է. «Այդ էջերն ուսումնասիրել է հայ պրոֆեսորը և հայտնել, որ դրանք Հայաստանում պահվող Զեյթունի հայտնի ավետարանի էջերն են։ Եթե անհրաժեշտ լինի, մենք կցուցադրենք մեր էջերը։ Բայց եթե պայմանավորվածություն ձեռք չբերվի, ապա մենք պահանջելու ենք նվազագույնը 50 միլիոն դոլարի փոխհատուցում»։
Նշվում է, որ 1910 թվականին Մելքոն Ադամյանը ձեռք է գցել 755 տարվա վաղեմություն ունեցող ավետարանի այդ 7 էջերը, իսկ 1916 թվականին դրանք իր հետ տարել ԱՄՆ։ Նրա ժառանգները 1994 թվականին 950,000 դոլարով այդ էջերը վաճառել են Գետիի թանգարանին։
