Պատասխանելով լրագրողների հարցին, թե հնարավո՞ր է, որ առաջիկայում Սերժ Սարգսյանը ցրի խորհրդարանը և անցկացնի խորհրդարանի նոր ընտրություններ, ԱԺ ՀՀԿ-ական պատգամավոր Ռաֆիկ Պետրոսյանն արձագանքեց. «Բացառվում է: ԱԺ-ն ցրելու Սահմանադրությամբ նախատեսված հիմքերը գոյություն չունեն»: Լրագրողների այն դիտարկմանը, որ հայ-թուրքական արձանագրությունները վերադարձվել են, և ԱԺ-ն այդ հարցում չի կայացրել որոշում, արդյոք դա բավարա՞ր հիմք չէ, Ռաֆիկ Պետրոսյանը հակադարձեց, որ Սերժ Սարգսյանն է կասեցրել հայ-թուրքական արձանագրությունները կյանքի կոչելը: Ինչ վերաբերում է ապագա խորհրդարանին, ապա Ռաֆիկ Պետրոսյանը նշեց, որ ընդդիմադիր համարվող «Ժառանգություն» կուսակցությունը կորցրել է իր ընտրողներից շատերի վստահությունը, քանի որ ամեն ինչ ներկայացնում է «սև ակնոցով» և կատարում է արտասահմանյան երկրների հանձնարարականները, իսկ ՀԱԿ-ն էլ պահանջում է, որ իրենց տան ողջ իշխանությունը: Վահագն Խաչատրյանը նշեց, որ, եթե ընտրություններն անցնեն ոչ թե այնպես, ինչպես անցան 2007-08 թթ. ընտրությունները, այլ օրենքների և Սահմանադրության համաձայն, ապա խորհրդարանում տեղ չեն ունենա ՀՀԿ-ն, «Օրինաց Երկիրը», «Բարգավաճ Հայաստանը», և կանցնեն այն ուժերը, որոնք ընդդիմադիր են ներկա իշխանությանը: Վահագն Խաչատրյանը հիշեցրեց, թե ինչպես ժամանակին իշխանությունները «Օրինաց Երկիր» կուսակցության ղեկավարին մեղադրեցին լրտեսության մեջ, իսկ 2008 թ. նրան նշանակեցին Անվտանգության խորհրդի քարտուղար: Անդրադառնալով Ռաֆիկ Պետրոսյանի հնչեցրած մեղադրանքին, որ ՀԱԿ-ն էլ է համագործակցում արտերկրի հետ, Վահագն Խաչատրյանը նշեց, որ Հայաստանում իշխանափոխությունը տեղի է ունենալու բացառապես ներքին ուժերով և ոչ թե արտերկրի աջակցությամբ: