Ինչպես հաղորդում են մեր աղբյուրները, նախագահականից հրահանգ է իջեցվել Երևանի նախկին քաղաքապետ Գագիկ Բեգլարյանի դեմ քրեական գործ հարուցելու վերաբերյալ: Այսօր փորձեցինք ՀՀ գլխավոր դատախազության մամուլի խոսնակ Սոնա Տռուզյանից պարզել՝ դատախազությունում արդեն գործ հարուցելու նախապատրաստական աշխատանքներ իրականցվո՞ւմ են, թե՞ ոչ: Սակայն Տռուզյանն ամեն կերպ խուսափեց հարցի բուն էությունից: «Խնդրում եմ, նախագահը նման ներքին հրահանգ իջեցրե՞լ է, թե՞ ոչ՝ ճշտեք նախագահի աշխատակազմից»,- ասաց Սոնա Տռուզյանը: Մեր այն հարցին՝ «ամեն դեպքում, դատախազությունը գործ հարուցելո՞ւ է, թե՞ ոչ», պատասխանեց. «Ես չեմ մեկնաբանելու նախագահին վերաբերող հայտարությունները։ Դրա համար գոյություն ունի նախագահի մամուլի ծառայություն և լրատվական կենտրոն: Այդօրինակ հարցերով դիմեք նախագահի լրատվական կենտրոնին: Դուք խոսում եք նախագահի ներքին հրահանգի, կարգադրության մասին: Հետևաբար, հրահանգի մասին ճշտեք նախագահի նստավայրից: Ճշտելուց հետո նոր միայն զանգ տվեք ինձ։ Դա արդեն կվերաբերի իմ հետագա գործառույթներին»: