Իրանական IRNA լրատվական գործակալության փոխանցմամբ՝ Իրանի Ազգային անվտանգության բարձրագույն խորհրդի փոխքարտուղար Ալի Բագիրին այսօր տեղի ունեցած մամլո ասուլիսի ժամանակ հայտարարել է, որ Իրանը չի դիտարկում իր նկատմամբ Իսրայելի հարձակման հնարավորությունը՝ գտնելով, որ դա շատ քիչ հավանական է։
Պատասխանելով լրագրողի հարցին, թե պատրա՞ստ է արդյոք Իրանը Իսրայելի կողմից հարձակման ենթարկվելու դեպքում պատասխան հարվածներ հասցնել Պարսից ծոցում ԱՄՆ դաշնակիցներին՝ Բագիրին նշել է.
«Մենք կարծում ենք, որ Իսրայելի կողմից Իրանի վրա հարձակման վտանգ չի առաջանա։ ԱՄՆ-ն Իրանին մեղադրում է իր միջուկային ծրագիրը ռազմական նպատակներով գործածելու մեջ, սակայն այդ մեղադրանքն անհիմն է։
Իրանը կարծում է, որ ԱՄՆ այդ դիրքորոշումը նրա մերձավորարևելյան քաղաքականության բազմաթիվ ուղղությունների պարտության արդյունք է։ ԱՄՆ-ը թուլանում է, ինչի համար էլ ամեն հնարավոր ձևերով լուրեր է տարածում, որ Իրանն իր միջուկային ծրագիրն օգտագործում է ռազմական նպատակներով։»
Հիշեցնենք, որ նոյեմբերի 4-ին Իսրայելի նախագահ Շիմոն Պերեսը հայտարարել էր, որ Իսրայելը գնալով ավելի է հակվում Իրանի խնդրի լուծման ուժային տարբերակին։
