Reuters գործակալության փոխանցմամբ՝ Իրանի հոգևոր առաջնորդ Այաթոլլա Ալի Խամենեին զգուշացրել է ԱՄՆ-ին և Իսրայելին որևէ գործողություն չձեռնարկել իր երկրի միջուկային օբյեկտների դեմ՝ խոստանալով դրա համար պատժել «ապտակով» ու «երկաթե ձեռքերով».
«Մեր թշնամիները, մասնավորապես սիոնիստական ռեժիմը (Իսրայել), ԱՄՆ-ն ու նրա դաշնակիցները պետք է իմանան, որ յուրաքանչյուր սպառնալիք ու հարձակում կամ էլ անգամ ռազմական գործողության մասին որևէ միտք կստանա կոշտ պատասխան։
Հեղափոխական գվարդիան ու բանակը և մեր ժողովուրդը այդ հարձակումներին կպատասխանեն ապտակներով ու երկաթե ձեռքերով»։
Հիշեցնենք, որ երեկ Իրանի ԱԳՆ-ի խոսնակ Ռամին Մեհմանփարասթը հայտարարել էր, որ Իրանը նախկինի նման պատրաստ է իր միջուկային ծրագրի շուրջ բանակցություններ վարել գերտերությունների հետ, բայց միայն այն դեպքում, եթե նրանք պատշաճ հարգանք ցուցաբերեն իր նկատմամբ։
