Հայ ազգային կոնգրեսի անդամ, Երևանի նախկին քաղաքապետ Վահագն Խաչատրյանը մամուլի ասուլիսի ժամանակ հայտարարեց, որ 2011 թ. բյուջեի ընդունումը ևս ոչինչ չի տալու Հայաստանի Հանրապետությանը, քանի որ այնտեղ չկա որևէ միտում, որը կարող է բարելավել ՀՀ քաղաքացու կյանքը: Վահագն Խաչատրյանի դիտարկմամբ, ՀՀ-ն ուզում է ատոմակայան կառուցել, բայց պարզվում է, որ ատոմակայանի համար գումար չունենք: Անդրադառնալով հրաժարական ներկայացրած Երևանի քաղաքապետ Գագիկ Բեգլարյանի այն հայտարարությանը, որ ՀՀ առաջին իշխանությունների օրոք էլ են եղել բռնություններ, Վահագն Խաչատրյանը նշեց, որ այն ժամանակ նա կարող էր դիմել իրավապահ մարմիններին և բողոքել այդ ամենի դեմ, ոչ թե 15-20 տարի անց հիշեցներ այդ մասին: ԱԺ ՀՀԿ-ական պատգամավոր Ռաֆիկ Պետրոսյանը նշեց, որ բյուջեն քննարկվել է ամենայն մանրամասնությամբ: Նրա դիտարկմամբ, բյուջեն չի հասել այն ծավալին, որը մենք կցանկանայինք ունենալ: Անդրադառնալով Գագիկ Բեգլարյանի հրաժարականին` Ռաֆիկ Պետրոսյանը նշեց, որ ինքը օրեր առաջ հայտարարել է` ՀՀ Նախագահը իրավունք ունի քրեական գործ հարուցելու, ինչն էլ սխալ է հասկացվել: Ռաֆիկ Պետրոսյանը հայտարարեց, որ Գագիկ Բեգլարյանը ցուցաբերել է ոհմակին բնորոշ հոգեբանություն և ոհմակին բնորոշ գործողություններ է իրականացրել: Նա ասաց, որ տարածված տեղեկատվության համաձայն, Գագիկ Բեգլարյանը մի քանի հոգու հետ միասին ծեծի է ենթարկել փոքրակազմ մի երիտասարդի: Այս արտահայտությունը հարուցեց բանավեճի հրավիրված Վահագն Խաչատրյանի զարմանքը: Նա հակադարձեց, որ Ռաֆիկ Պետրոսյանը նման գնահատականներ չպետք է հնչեցնի, քանի որ կա դատարան, կան իրավապահ մարմիններ, պետք է կատարվի օբյեկտիվ քննություն, և նրանք պետք է գնահատական տան կատարվածին: Վահագն Խաչատրյանը հիշեցրեց, որ Ռաֆիկ Պետրոսյանը, իրեն իրավունք վերապահելով, գնահատակններ էր հնչեցնում նաև 2008 թ. մարտի 1-ի դեպքերից հետո, և նա իր չորս գործընկեր ԱԺ պատգամավորներին այդ կերպ հանձնեց իրավապահ մարմիններին: