«Մոռացեք հերթական ընտրությունների մասին, երկիրը գնում է արտահերթ ընտրությունների»,- լրագրողների հետ հանդիպման ժամանակ հայտարարեց ՀՀՇ վարչության նախագահ Արամ Մանուկյանը: Նրա խոսքերով, իրավիճակի տրամաբանությունն է խոսում արտահերթ ընտրությունների օգտին: Մանուկյանի գնահատմամբ, այս իշխանությունները ոչ մի քայլ չեն կատարել երկրում ժողովրդավարության հաստատման համար, քաղբանտարկյալների առումով ևս քայլեր չեն ձեռնարկվել: Իսկ վերջին շրջանում քաղբանտարկյլաների ազատ արձակումը Արամ Մանուկյանը պայմանավորեց ճնշումներով և նշեց, որ իրենք ճնշումներն էլ ավելի են ուժեղացնելու: Ըստ Մանուկյանի` բացի քաղաքական խնդիրներից, խորն են նաև տնտեսական խնդիրները, որոնց էլ գումարվել են ուրանի պատմությունը, զենքի վաճառքի մասին Wikileaks-ի բացահայտումները: «Թե՛ ԱՄՆ-ն և թե՛ Ռուսաստանը բացում են իրենց ունեցած բոլոր կոմպրոմատները, և Սերժ Սարգսյանն այլևս մանևրելու տեղ չունի: Ներիշխանական գզվռտոցներն էլ են նպաստում արտահերթ ընտրություններին, դա է վկայում Բեգլարյանի և արդարադատության նախարարի հրաժարականները»:
ՀՀՇ վարչության նախագահ Արամ Մանուկյանը կարծիք հայտնեց, որ արտահերթ ընտրություններում այս իշխանությունների այլընտրանքը միայն ՀԱԿ-ն է, մնացածները լուրջ խնդիրներ չեն կարող լինել. «Ես կասկածանքով եմ նայում այն ընդդիմություններին, որոնք չեն ուզում, կամ չեն նկատում Հայաստանի տնտեսական և քաղաքական գահավիժումը»:
Մանուկյանը Դաշնակցությանը ընդդիմություն չի համարում, քանզի վերջիններս իշխանության մեջ են, ունեն լծակներ և չեն ընդունում, որ Հայաստանում կան քաղբանտարկյալներ: «Ժառանգությունն» էլ, ըստ Մանուկյանի, լծակներ չունի, սակայն ունի համարձակության պակաս և պոպուրիստական քայլեր է անում: Մանուկյանը «Ժառանգության» կողմից պարզունակ պոպուրիզմ համարեց ԼՂ անկախության ճանաչման հարցը ԱԺ-ում բարձրացնելը: