Իսրայելական Zman կայքի փոխանցմամբ՝ այս տարվա սեպտեմբերին ԱՄՆ-ը Իսրայել է փոխադրել 55 «սուպերռումբ», որոնք նախատեսված են ստորգետնյա բունկերներ ներթափանցելու և լավ ամրացված ստորգետնյա կառույցների ներսում հրդեհներ առաջացնելու համար։ Այդ ռումբերից յուրաքանչյուրը կշռում է 1 տոննա։ Ճեղքելով բունկերի առաստաղը՝ նման ռումբն այնտեղ առաջացնում է հրդեհ։
Այսպիսի տեղեկատվություն հրապարակել է փարիզյան «Կանար Անշենե» շաբաթաթերթը՝ վկայակոչելով ֆրանսիական հետախուզական ծառայություններին։ Թերթը գրում է, որ այդ «սուպերռումբերը» Իսրայել են տեղափոխվել այն պարագայի համար, եթե վարչապետ Բենիամին Նեթանյահուի գլխավորած կառավարությունը որոշում ընդունի իրանական միջուկային օբյեկտների վրա հարձակվելու մասին։
Հիշեցնենք, որ երեկ Իսրայելի պաշտպանության նախարար Էհուդ Բարաքը հերքել է այն տեղեկատվությունը, թե Իսրայելում Իրանի վրա հարձակվելու որոշում են ընդունել։