IRNA լրատվական գործակալության փոխանցմամբ՝ Իրանի նախագահ Մահմուդ Ահմադինեժադը հրաժարվել է ընդունել երեկ ԱԷՄԳ-ի կողմից Իրանի միջուկային ծրագրին առնչվող զեկույցը, որում նշված է, որ Իրանը զբաղված է միջուկային զենքի մշակմամբ։
Ահմադինեժադի խոսքերով՝ ԱԷՄԳ-ի այդ զեկույցը հենված է ոչ հավաստի տեղեկությունների վրա։ Ահմադինեժադն ընդգծել է, որ Թեհրանը մտադիր չէ ոչ մի «կաթիլ» նահանջել իր միջուկային ծրագրի հարցում։
Ահմադինեժադն անդրադարձել է նաև Օբամայի վարչակազմի կողմից Իրանի հասցեին արված քննադատությունների խնդրին. «ԱՄՆ-ը փոշմանելու է Իրանի հետ հակամարտության մեջ մտնելու համար։ Միջուկային զենքի մշակման մեջ Իրանին մեղադրող Օբամայի կառավարությունը, որի տրամադրության տակ առկա է 5000 ատոմային ռումբ, 81 միլիարդ դոլար է հատկացրել այդ ատոմային ռումբերի արդիականացման համար։
Մինչդեռ Իրանը մոտ 250 միլիոն դոլար է ծախսել իր միջուկային հետազոտությունների վրա։ Ո՞վ է ավելի մեծ վտանգ ներկայացնում. Իրա՞նը, թե՞ նա, ով ունի ատոմային զինանոց և ստեղծում է նոր ատոմային ռումբեր»։
Ահմադինեժադը Վաշինգտոնին կոչ է արել հրաժարվել Իրանի հանդեպ թշնամական քաղաքականությունից։
Հիշեցնենք, որ եգիպտական «Ալ-Ահբար» թերթին տված հարցազրույցում էլ Ահմադինեժադը հայտարարել էր, որ 300 միջուկային մարտագլխիկ ունեցող Իսրայելն տարածաշրջանային ավելի մեծ սպառնալիք է, քան միջուկային ռումբ չունեցող Իրանը։