Դժվար է հավատալ, որ հսկայական աշխատակազմ ունենալով` ոչ ինքդ հիշեցիր, ոչ էլ կողքից հիշեցրին, որ մի քսան օր առաջ հրապարակայնորեն մի որոշակի խոստում էիր տվել: Դե, որ ոչ ոք չի հիշեցնում, ստիպված պետք է հիշեցնել, որ սեպտեմբերի 27-ին` «Հանրակրթության մասին» եւ «Լեզվի մասին» ՀՀ օրենքներում փոփոխություններ եւ լրացումներ կատարելու վերաբերյալ հրավիրված խորհրդարանական լսումների ժամանակ, խոսելով ազգապահպանության, հայերենի դերի եւ նշանակության (…), ինչպես նաեւ կրթական ժամանակակից չափանիշներից, խոստացար, որ ամեն դեպքում օրինագծերի հեղինակ Ա.Աշոտյանը պետք է «Լեզվի մասին» օրենքը հանի փաթեթից` փոփոխություններ կատարելով միայն «Հանրակրթության մասին» ՀՀ օրենքում: Հպարտ հայի կեցվածքով մանրամասնեցիր, որ այդ խնդիրը քննարկել ես Սերժ Սարգսյանի եւ կոալիցիոն մյուս գործընկերների հետ, հասկացել եք, թե լեզուն ինչ կարեւոր է, եւ «Լեզվի մասին» օրենքում փոփոխություններ չանելը ընդհանուր-իշխանական որոշում է: Բայց արի ու տես, որ Հայաստանում քսան օրը բավական երկար ժամանակ է սեփական խոստումը հիշելու համար, եւ ԱԺ գիտության, կրթության (…) մշտական հանձնաժողովն այսօր կքննարկի ««Լեզվի մասին» ՀՀ օրենքում փոփոխություններ եւ լրացումներ կատարելու մասին» օրինագիծը:
Այսքանից հետո խոսվում է, որ ունես սեփական քաղաքական ապագայի վերաբերյալ բավական լավ կարծիք, այսինքն` ուզում ես դիրքը բարձրացնել: Բայց ամենայն հավանականությամբ հենց «ճկուն ու բարբարոս» հայոց լեզուն կդառնա քո քաղաքական գերեզմանաքարը:
