Ամերիկյան ավիաընկերությունները եվրոպացի իրենց մրցակիցներից հետո անցում են կատարում բիովառելիքին: Նոյեմբերի 7-ին մեկնարկել է United Airlines ավիաընկերության առաջին թռիչքը Հյուսթոնից Չիկագո՝ բիովառելիքի մասնակի օգտագործմամբ: Boeing 737-824 ուղևորատար ինքնաթիռը 40%-ով լիցքավորված է եղել բիովառելիքով: Այս մասին հաղորդում է The Wall Street Journal պարբերականը:
Չորեքշաբթի ամերիկյան մեկ այլ ավիափոխադրող՝ Alaska Airlines-ը, նախատեսում է չվերթ իրականացնել բիովառելիքի 20% լիցքավորմամբ:
Բիովառելիքը հնարավորություն կտա մինչև 80%-ով կրճատել ածխաթթու գազի արտանետումները, որի համար նույնպես ավիաընկերությունները վճարում են: Սակայն առայժմ բիովառելիքի և նավթի գներն անհամատեղելի են: Բիովառելիքը նավթից 6 անգամ թանկ է, սակայն ավիափոխադրողները հույս ունեն արտադրության աճի ընթացքում հասնել գների իջեցման: