Իրանական Mehr գործակալության փոխանցմամբ՝ Իրանի ռազմածովային ուժերի հրամանատար Հաբիբուլլահ Սայարին, մեկնաբանելով ԶԼՄ-ներում տեղ գտած այն տեղեկատվությունը, թե իրանական նավերը չեն կարող մոտենալ ամերիկյան ափերին, հայտարարել է, որ Իրանի ռազմանավերը կմեկնեն ԱՄՆ-ի ափեր.
«Միջազգային օրենքներով յուրաքանչյուր երկրի ռազմածովային ուժեր կարող են գտնվել ազատ ջրերում։ Դա նշանակում է, որ Իրանի ռազմանավերն իրավունք ունեն գտնվելու ԱՄՆ-ի ափերի մոտ։ Իրանն իր ռազմանավերը կուղարկի Ատլանտյան օվկիանոս։
Իրանական ռազմանավերը լողալու են ազատ ջրերում։ Մեր նավերը լողալու են ցանկացած կետում, որը միջազգային օրենքներով նշված է որպես ազատ ջրային գոտի։ ԱՄՆ տարածքային ջրերից հետո սկսվում են ազատ ջրերը, ուր կարող են հայտնվել իրանական ռազմանավերը»։
Հիշեցնենք, որ 1982 թվականի ՄԱԿ-ի ծովային կոնվենցիայով տարածքային ջրերի տակ հասկացվում է ափամերձ ջրային (նաև օդային և ստորջրյա) տարածքը, որը համարվում է այդ երկրի տարածքի մի մասը, ներքին ջրերը, և որոնց վրա տարածվում է ափամերձ պետության ինքնիշխանությունը։
Տարածքային ջրերի երկարությունը սահմանված է 12 ծովային մղոն (22.2 կիլոմետր), թեև մի շարք երկրների, օրինակ՝ Բրազիլիայի համար բացառություն է արված՝ թույլատրելով ունենալ ավելի երկար տարածքային ջրեր։
