ՀՀ ոստիկանության ԿՀԴՊ գլխավոր վարչությունում նախապատրաստված նյութերի հիման վրա 2011թ. նոյեմբերի 5-ին ՀՀ քրեական օրենսգրքի 311-րդ հոդվածի 4-րդ մասի 2-րդ կետի, 312-րդ հոդվածի 3-րդ մասի 1-ին կետի և 38-312-րդ հոդվածի 3-րդ մասի 1-ին կետի հատկանիշներով քրեական գործ է հարուցվել միջնորդների միջոցով քաղաքացի Ք.Ա-ին քրեական պատասխանատվությունից ազատելու համար Երևան քաղաքի վարչության Էրեբունու բաժնի պետի օպերատիվ գծով տեղակալ Միհրան Քեշիշյանին 13.000 ԱՄՆ դոլար կաշառք տալու դեպքի առթիվ:
Գործով կատարվել ու կատարվում են քննչական և օպերատիվ անհետաձգելի գործողություններ: Միհրան Քեշիշյանին որպես մեղադրյալ ներգրավելու որոշում է կայացվել, խափանման միջոց է կիրառվել կալանավորում և հայտարարվել է հետախուզում (վերջինս դիմել է փախուստի):
«Առաջին լրատվական»-ին հայտնի է դարձել, որ Երևան քաղաքի վարչության Էրեբունու բաժնի պետի օպերատիվ գծով տեղակալ Միհրան Քեշիշյանը, Հայ ազգային կոնգրեսի անդամ, բռնցքամարտիկ, Եվրոպայի կրկնակի չեմպիոն Սամսոն Խաչատրյանի դեմ այս տարի գարնանը հարուցված քրեական գործով վկա ոստիկաններից մեկն է:
Հիշեցնենք, որ Սամսոն Խաչատրյանը մեղադրվում էր 316 հոդվածի 1-ին մասով (իշխանության ներկայացուցչի նկատմամբ բռնություն գործադրելը): Նրա նկատմամբ խափանման միջոց էր ընտրվել երկամսյա կալանքը:
Մարտի 19-ին Սամսոն Խաչատրյանը Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում դատավոր Մխիթար Պապոյանը որոշմամբ մեկ տարվա պայմանական ազատազրկման դատապարտվեց: