«Դժվար է պատկերացնել, թե 460 հազար մարդ 28-30 հազար դրամով ինչպես է գոյատևում: Դրանից ավելի մեծ առաջնահերթություն ես չեմ տեսնում»,- այսօր լրագրողների հետ զրույցում նման կարծիք հայտնեց ՀՀ ֆինանսների նախարարի առաջին տեղակալ Պավել Սաֆարյանը` հավելելով, որ այդ խնդիրը լուծելու և կենսաթոշակները որոշ չափով ավելացնելու համար որոշվեց հարկերը 15 մլրդ դրամով ավելացնել:
2012 թ. պետբյուջեի նախագծով նախատեսվող հարկային հավաքագրումների 101 մլրդ դրամով ավելացման վերաբերյալ ՊԵԿ-ի անհամաձայնությունները Պ. Սաֆարյանը բնական համարեց, սակայն հայտարարեց, որ բյուջեի մեջ դրված թիվը կատարելի թիվ է, որովհետև դրա տակ ծախս է դրվել:
«Առաջին լրատվական»-ի հարցին՝ ինչպե՞ս կբնորոշի հաջորդ տարվա բյուջեն, Պ. Սաֆարյանը պատասխանեց. «Կարող եմ միանալ այն կարծիքին, որ դա սոցիալական է, կարող եմ միանալ ընդդիմության կարծիքին, որ սոցիալական չի, եթե ասեն, թե ինչ են հասկանում դրա տակ: Եթե ձեր տանը ունենաք 50 հազար դրամ ու դրանից 40 հազարը հատկացնեք սոցիալական ծասերին, ձեր ծախսերն ի՞նչ բնույթ են ունենում: Հիմա մեր բյուջեի 75-80%-ը սոցիալական ծախսեր են»:
Նա նշեց, որ 101 մլրդ դրամ հավելումների մի մասը (56 մլրդ) տնտեսական գործոններով է պայմանավորված, մի մասը` վարչարարությամբ և օրենսդրությամբ. «Ստվեր կոչեցյալը և՛ լավ առումով, և՛ վատ առումով աշխարհի բոլոր երկրներում էլ կա: Օրինակ՝ ԱՄՆ-ում մի քանի տարի առաջ 6%-ի էր հասնում: Դժվար է ասել, թե ՀՀ-ում որ ոլորտներում չկա ստվեր: Ներկայում ավելի շատ ընդերքի ոլորտն ենք քննարկում, որտեղից կարելի է բավականին ավելացնել հարկումը»:
Մենաշնորհների հարկման վերաբերյալ փոխնախարարը վստահություն հայտնեց, որ դա կարող է ադյունավետ լինել. «Պրոգրեսիվ հարկմանը սկզբունքորեն դեմ չեմ, որ կարելի է քննարկել: Կան տարբեր մոտեցումներ: Օրինակ՝ եթե բարձր շահութաբերության գումարները ունեզրկեն օլիգարխներին, դա կբերի ավելի մեծ ստվերի: Ստվերի մի քանի պատճառներ կան. օրինակ՝ ստվերի պատճառներից մեկն այն է, որ օրենքը կարելի է մի քանի ձևով մեկնաբանվել, հարկային ոլորտներ կան, որ դժվար է վերահսկել, պատճառները կարող են նաև քաղաքական լինել: Իսկ հիվանդին ճիշտ բուժելու համար ճիշտ դեղատոմս պետք է տալ»: