ՀՅԴ ներկայացուցիչ Կիրո Մանոյանը կարծում է, որ Իրանի ԱԳ նախարար Ալի Աքբար Սալեհիի` Հայաստան կատարելիք այցի ընթացքում կքննարկվի ոչ միայն այդ երկրի նախագահ Մահմուդ Ահմադինեժադի այցը նախապատրաստելու հարցը, այլ նաև երկու կողմերն անդրադարձ կկատարեն տնտեսական և քաղաքական բնույթի մի շարք հարցերի: Նման տեսակետ նա հայտնեց «Առաջին լրատվական»-ի հետ զրույցում:
«Կողմերը կարող են երկու երկրների հարաբերություններին վերաբերող շատ հարցեր քննարկել, հատկապես տնտեսական բնագավառի: Չի բացառվում նաև, որ տարածաշրջանային բնույթի որոշ հարցեր քննարկվեն: Նախորդ անգամ Ահմադինեժադի այցը չկայացավ, և այս անգամ պետք է աշխատանք տարվի, որպեսզի այդ հանդիպումը կայանա: Կարծում եմ՝ կարևոր պետք է լինի էներգետիկայի և բնական պաշարների նախարար Արմեն Մովսիսյանի հետ կայանալիք Սալեհիի հանդիպումը, որի ընթացքում ոլորտին վերաբերող հարցեր կքննարկվեն: ԱԳ նախարարի հետ, պարզ է, կքննարկվեն տարածաշրջանային բնույթի հարցեր, իսկ ահա նախագահի հետ` Ահմադինեժադի այցի վերաբերյալ խնդիրներ»,- կանխատեսեց Կիրո Մանոյանը:
Նշենք, որ Իրանի ԱԳ նախարար Ալի Աքբար Սալեհին, ըստ ՀՀ արտգործնախարարությունում «Առաջին լրատվական»-ի աղբյուրի հավաստման, Հայաստան կժամանի առաջիկա երեքշաբթի օրը՝ նոյեմբերի 8-ին:
Հիշեցնենք նաև, որ այցն աշխատանքային է: Ըստ ամենայնի, իրանցի պաշտոնյան Հայաստան է ժամանում՝ նախապատրաստելու Իրանի նախագահ Մահմուդ Ահմադինեժադի այցը Հայաստան, որը կայանալու է մինչև ընթացիկ տարեվերջ:
Հիշեցնենք նաև, որ Իրանի նախագահ Մահմուդ Ահմադինեժադի` հունիսի 6-ին Հայաստան կատարելիք այցն այդպես էլ չէր կայացել: