Մինչև 2012 թ. բյուջեի ընդունումը կհստակեցվեն սոցիալական փաթեթի բոլոր վիճելի հարցերը, և այն կկիրառվի 2012 թ. հունվարի 1-ից: Ինչպես այսօր Ազգային ժողովում հայտարարեց ֆինանսների փոխնախարար Պավել Սաֆարյանը, կառվարությունում քննարկվել է աշխատավարձը բարձրացնե՞լ, թե՞ սոցիալական փաթեթ տրամադրել, և կշեռքի նժարները թեքվել են դեպի սոցփաթեթի կողմը.
«Որոշվեց սոցիալական փաթեթի տարբերակը, որովհետև դա ավելի հավասար քաղաքականություն է ապահովում: Այսինքն՝ այդ գումարը կլինի միջին հաշվով 100-120 հազար դրամ, որը տրվելու է բոլորին հավասար չափով: Այսինքն՝ 300 հազար դրամ ստացողն էլ կստանա նույն փաթեթը, 100 հազար կամ 40 հազար դրամ ստացողներն էլ: Տեխնոլոգիան մանրամասն մշակված է, միայն մի խնդիր կա՝ շահառուների թվաքանակի վերջնական ճշգրտումը, որովհետև կան շահառուներ, որոնք, ըստ էության, բյուջետային ոլորտում չեն շրջանառվում: Խոսքը վերաբերում է ՊՈԱԿ-ներին: Պետբյուջեից ուղղակի և անուղղակի սնվող բոլոր աշխատողներին պետք է հաշվառել, որովհետև այդ գումարը գոնե 100 հազարից պետք է պակաս չլինի»:
Ըստ Պ.Սաֆարյանի՝ բյուջեի մեջ սոցփաթեթի հիմքում դրված 18 մլրդ դրամը ամբողջ հանրային ոլորտում (ուժային ոլորտ, ՊՈԱԿ-ներ, քաղծառայություն) բյուջեի մեջ աշխատավարձերի ֆոնդի 10%-ի չափով է: Միջնաժամկետ ծախսային ծրագրով 2013 թ.-ին նախատեսվում է աշխատավարձերի 10% բարձրացում, 2014-ին՝ 20%:
Շահառուն կկարողանա փաթեթն օգտագործել 4 նպատակներով ՝ բժշկական ապահովագրության համար, հիփոթեքային, ուսման վարձ կամ էլ ՀՀ-ում և ԼՂՀ-ում իր հանգստի դիմաց վճարելու համար:
ՀՅԴ պատգամավոր Արծվիկ Մինասյանի կարծիքով՝ վիճահարույց է հիփոթեքային վարկի սուբսիդավորման հարցը, որովհետև քաղծառայողները կամ հանրային ծառայողներն իրենց աշխատավարձով բնակարան ձեռք բերելու ֆինանսական հնարավորություն չունեն, մանավանդ, որ սահմանափակված են այլ գործունեություն իրականացնելու առումով. «Ստացվում է, որ ձևական ենք դարձնում այս փաթեթում այդ բլոկի օգտագործումը»,- նշեց պատգամավորը՝ հավելելով, որ նույնը հանգստի դեպքում՝ չի կարողանա ամբողջ ընտանիքով գնալ հանգստի, և նույնը կրթության առումով՝ վարձավճարներն այնքան բարձր են, որ չեն կարողանա վճարել, և 200 հազար շահառուների դեպքում կստացվի որ շատ չնչին գումարի մասին է խոսքը:
ԱԺ Սոցիալական հարցերի մշտական հանձնաժողովի նախագահ Հակոբ Հակոբյանը նկատեց, որ եթե փորձենք սոցփաթեթը վերածել աշխատավարձի, ապա նաև հարկերի գանձման մեխանիզմն էլ պետք է հստակ աշխատի, այսինքն՝ կառավարությանը դա ձեռք է տալիս, բայց այդ նպատակով հատկացվելիք 18 մլրդ դրամի դեպքում, բյուջեն կորցնում է 4 մլրդ դրամ հարկ, և այդ 4 մլրդ-ը ուղիղ գնում է նշված ոլորտների համար:
