«Ուրբաթ» ակումբում կայացավ Սարգիս Գարուկյանի «Երկխոսություն» ցուցահանդեսը:
«Մենք որոշեցինք ցուցահանդեսին անուն կնքել, ճիշտ է` սովորաբար այդպես չի լինում, հուսանք, որ կկայանա դիտորդի և կտավի «երկխոսությունը»: Նկարները տարբեր ժամանակի նկարներ են, կարծես մի փունջ լինի»,-նշեց գեղանկարիչը:
Ցուցադրությանը ներկա էին Սարգիս Գարուկյանի ընկերները,մտերիմներն ու հարազատները: Սարգիս Գարուկյանի լավ բարեկամ, ընկեր` Սպարտակ Ղարաբաղցյանն ասաց, որ նա տաղանդավոր է բոլոր առումներով և նրա տեսակի մարդիկ շատ կան, պարզապես նրանց գտնել է պետք:
Մեր այն հարցին, թե ինչ ցավոտ կողմեր ունի ժամանակակից գեղանկարչությունը, Սարգիսը պատասխանեց, որ չի կարողանում պատկերացնել, թե ինչ ասել է ժամանակակից գեղանկարչություն. նա ով հիմա նկարում է ժամանակակից է, և ավելացրեց, որ ցավոտ կողմեր չկան, ամեն ինչ լավ է:
«Ես տեսել եմ, թե ինչպես է Սարգիսն աշխատում, տեսել եմ նրա ազնվությունը: Սարգիսի նկարներից հորդում է գույների ջերմությունը, և այստեղ կարևորն այն է, որ դիտորդը զգա այն, ինչ ցանկանում էր փոխանցել Սարգիսը»,- մեզ հետ կիսվեց Սարգիս Գարուկյանի լավ ընկեր, երկրպագու, ուղղակի դիտորդ Անուշ Բաբայանը: