Բրիտանական «LINKS» ոչ կառավարական կազմակերպության գործադիր տնօրեն Դեննիս Սամմուտը Ռազմավարական և ազգային հետազոտությունների հայկական կենտրոնում կազմակերպված քննարկման ժամանակ հույս հայտնեց, որ իրենք կկարողանան առաջիկայում բանավեճեր կազմակերպել Հայաստանի և Ադրբեջանի քաղաքական գործիչների միջև: Նա ցավ հայտնեց, որ Ադրբեջանում գերիշխում է այն տեսակետը, որ ԼՂ հակամարտությունը հնարավոր է կարգավորել ռազմական լուծումներով: «Ես աջակցում եմ Մինսկի խմբին և շատ եմ ցանկանում, որ նա հասնի հաջողության»,- ասաց նա: Միաժամանակ նա կարծիք հայտնեց, որ պետք չէ վախենալ Մինսկի խմբին քննադատելուց: Դեննիս Սամմուտը նշեց, որ Աստանան ևս մեկ բաց թողնված հնարավորություն է, քանի որ այնտեղ երկու երկրների նախագահները բավարարվեցին միայն հայտարարություններ անելով: Դեննիս Սամմուտի դիտարկմամբ`«1990-94 թթ. քաղաքական կուսակցությունների մեծ մասը ներգրավված է եղել ԼՂ հակամարտության կարգավորման հարցում, և նրանք պետք է կայացնեն բարդ որոշում: «Հյուսիսային Իռլանդիայի հակամարտությունը կարողացան լուծել այն մարդիկ, որոնք դեմ էին միմյանց: Հայաստանի քաղաքական կուսակցությունների մեծ մասում ներգրավված մարդիկ պետք է ուժ և բարոյականություն ունենան`կայացնելու բարդ որոշումներ»,- ասաց նա: Ինչ վերաբերում է ՀՀ-ի կողմից ԼՂ ճանաչմանը, որն առաջարկում է «Ժառանգություն» կուսակցության ղեկավար Րաֆֆի Հովհաննիսյանը, ապա Դեննիս Սամմուտը նշեց, որ ինքը հանդիպել է պարոն Հովհաննիսյանի հետ և փորձել է հասկանալ, թե ինչու է նա այդ գաղափարին կողմ: «Շատ հարգում եմ նրա կարծիքը, բայց չեմ կարծում, թե այդ քայլը որևէ մեկին օգուտ կտա: Միակ հետևանքն այն կլինի, որ կբարկացնենք Ադրբեջանին, բայց թե ինչ օգուտ կտա Հայաստանին` չգիտեմ»,- ասաց Դեննիս Սամմուտը: Նա ասաց, որ թեև բանակցող կողմերը Հայաստանը և Ադրբեջանն են, բայց ԼՂ իշխանություններն ինչ-որ պահի պետք է ներգրավվեն հակամարտության մեջ: Դեննիս Սամմուտը նշեց նաև, որ Ադրբեջանի քաղաքական գործիչները կարծիք են հայտնել, որ Լեռնային Ղարաբաղը պետք է ներգրավվի բանակցություններում, սակայն դա Ադրբեջանի պաշտոնական դիրքորոշումը չէ: «Կարծում եմ, որ միջազգային հանրությունը պետք է լսի Լեռնային Ղարաբաղի ձայնը և նրան ներգրավի բանակցություններում: Ինքս քննադատում եմ Մինսկի խմբին, որովհետև այն շատ թերություններ ունի, բայց կարծում եմ, չպետք է փոխել ձևաչափը»,- ասաց բրիտանական կազմակերպության գործադիր տնօրենը:
