Այսօր հրավիրված մամուլի ասուլիսի ընթացքում լրագրողները ՆԺԿ նախագահ Արամ Կարպետյանից հետաքրքրվեցին, թե հնարավո՞ր է, որ Քոչարյանների ընտանիքը, դատի տալով «Ժամանակ» օրաթերթին, ակտիվանալու փորձեր է անում: Արամ Կարապետյանը բացառեց և ավելացրեց, որ շատ հաճախ անձամբ է բախվել լրատվամիջոցների հետ այն պարագայում, երբ անձնական վիրավորանք են հասցրել: «Ես «Ժամանակ» օրաթերթը շատ հավանում եմ, շատ լավ թերթ է: Ճիշտն ասած՝ չեմ տեսել, որ Ռոբերտ Քոչարյանին կամ ինչ որ մեկին ուղղակի անձնական վիրավորանք հասցնեն: Եթե հիշում եք, Գագիկ Բեգլարյանի մասին առաջին անգամ տպվեց «Ժամանակում»: Գուցե Ռոբերտ Քոչարյանի թիմը կասկածներ ունի, որ «Ժամանակը» ինչ-որ ձևով զուտ ինֆորմացիոն առումով օգտագործվել է ինչ-որ խնդիրներ լուծելու համար: Թերթի հետ իմ հարաբերությունները չեզոք են, սակայն «Ժամանակը» հիմա, իմ կարծիքով, կատարում է շատ մեծ և կարևորագույն աշխատանք: Հենց միայն այն, որ նա թերթում տպեց առաջին մարդասպանները անուն, ազգանուններով, ավելին՝ դրեց նկարներ, դա արդեն լուրջ քայլ է: Ես գիտեմ, թե դա ինչ է նշանակում, և գիտեմ դրա չերևացող մասը:Շատ մեծ խիզախություն է պետք նման քայլի գնալու համար: Ես կարծում եմ, որ «Ժամանակին» ինչ-որ ձևով քոչարյանական թիմը կասկածում է , որ թերթը դառնում է խարդավանքների հանգրվան: Բայց դա միայն կարծում են»,- պարզաբանեց Արամ Կարապետյանը:
