Բրիտանական «Լինքս» կազմակերպության անցկացրած «Հայկական քաղաքական կուսակցությունների մոտեցումները Լեռնային Ղարաբաղի հիմնախնդրի կարգավորման հարցում» թեմայով ուսումնասիրությունների արդյունքում բացահայտվել է, որ այսօր ԵԱՀԿ Մինսկի խմբին այլընտրանք չկա: Երկրորդ բացահայտումը, ըստ Ռազմավարական և ազգային հետազոտությունների հայկական կենտրոնի ղեկավար Ռիչարդ Կիրակոսյանի, այն է, որ Թուրքիան չպետք է աջակցի ԼՂ հիմնախնդրի կարգավորման հարցում, քանի որ պաշտպանում է Ադրբեջանի դիրքորոշումը: Ըստ ուսումնասիրությունների արդյունքների` պարզվել է, որ Եվրամիությունը պետք է ավելի շատ ներգրավված լինի այդ գործընթացում, իսկ Լեռնային Ղարաբաղը հանդես գա որպես բանակցությունների կողմ: «Այսօր մենք կարիք ունենք հասարակության ավելի մեծ ներգրավվածության: Բավական երկար ժամանակ է, ինչ ազգային հարցերը հասարակական քննարկման չեն արժանացել»,- քննարկման ժամանակ հայտարարեց Ռիչարդ Կիրակոսյանը: