Համաիսրայելական «Հիստադրութ» արհմիությունների միավորումը նոյեմբերի 7-ին հայտարարել է համընդհանուր գործադուլ, որը, դատարանի որոշմամբ, տևել է ընդամենը չորս ժամ:
Ինչպես հայտնում է իսրայելական «Ռեշեթ Բեթ» ռադիոկայանը, գործադուլը ընդգրկել է պետական հաստատությունները, այդ թվում՝ նաև տրասնպորտային կազմակերպությունները, նավահանգիստները, երկաթուղային ընկերությունները: Իսրայելի Բեն Գուրիոն միջազգային օդանավակայանը նույնպես դադարեցրել է իր աշխատանքը: Չեն աշխատել բանկերը, պետական մանկապարտեզները և դպրոցները:
Գործադուլի կոչ է արել համաիսրայելական «Հիստրադութ» արհմիությունների միավորումը՝ Իսրայելի ֆինանսների նախարարի հետ բանակցություններից հետո: Արհմիությունները պահանջում են փոխել պետական և մասնավոր հատվածում աշխատանքի ընդունելու կարգը, փոփոխություններ մտցնել աշխատանքային պայմանագրի ձևում:
Սակայն գիշերը աշխատանքային հարցերով համաիսրայելական դատարանը վճիռ էր կայացրել գործադուլը անցկացնել չորս ժամով: Համաիսրայելական արհմիությունների շարժման ղեկավարությունը կոչ է արել բոլոր պայմանագրային աշխատողներին դատարանի նշած ժամին վերադառնալ իրենց աշխատատեղեր: