Նոյմբերի 6-ին Վաշինգտոնում բողոքի ցույց է տեղի ունեցել Keystone XL միջազգային նավթամուղի շինարարության դեմ, որին մասնակցել են հազարավոր մարդիկ:
Ինչպես հայտնում է Associated Press գործակալությունը, Սպիտակ տան մոտ գտնվող Լաֆայետ հրապարակ էր դուրս եկել մոտավորապես ութ հազար մարդ: Ցուցարարները պահանջում էին չեղյալ հայտարարել նավթամուղի շինարարությունը, որը, ըստ նրանց, վնաս է հասցնում շրջական միջավայրին: Ցուցարարների թվում էին նաև հանրահայտ մարդիկ՝ դերասան Մարկ Ռուֆֆալոն և նոբելյան դափնեկիր Ջոդի Ուիլյամսը: Ցուցարարները ձեռք ձեռքի բռնած շրջափակել էին Սպիտակ տունը:
Ինչպես նշում է գործակալությունը, այդ ժեստը խորհրդանշում էր «ճնշում», որը ցուցարարները գործադրում էին ԱՄՆ նախագահ Բարաք Օբամայի և նրա վարչության անդամների վրա: Ներկայումս նավթամուղի կառուցման նախագիծը վերանայվում է ԱՄՆ պետդեպարտամենտում:
Ենթադրվում է, որ Կանադայից Keystone XL նավթամուղով նավթ կտեղափոխվի Տեխաս նահանգի Հյուսթոն և Պորտ-Արթուր քաղաքների նավթավերամշակման գործարաններ: Այն անցնելու է վեց նահանգների միջով, երկարությունը կազմելու է 2,735 կմ: Նախագծի արժեքը կազմում է 7 միլիարդ դոլար:
Բացի շրջակա միջավայրին վնաս հասցնելուց, ցուցարարները Օբամայի ուշադրությունը հրավիրում են այն բանի վրա, որ Keystone XL-ով տեղափոխվելու է «սև նավթամթերք», որի մշակումը նավթավերամշակման գործարաններում կպահանջի մեծ ծախսեր: Այն իր հերթին հանգեցնելու է տնտեսական վնասների:
Գործակալությունը նշում է, որ Օբաման բաց է թողել ցույցը, քանի որ այդ ժամանակ Վիրջինիա նահանգում գոլֆ էր խաղում: